राजीनामा बीमखु : प्रधानमन्त्री नेपाल
प्रधानमन्त्री माधवकुमार नेपालं सरकार परिर्वतनया हल्ला जुयाच्वंसां थ:म्हं राजीनामा मबीगु खँ धयादीगु दु । वय्कलं वर्तमान सरकारया पक्षय् बहुमत यथावत दुगु व दलत नापया सहलह लिपाः थःगु पक्षय् बहुमत झन बल्लाःगुलिं राजीनामा मबीगु धयादिल ।
शुक्रवाः सुथय् रिपोटर्स क्लबया न्हूगु कार्यसमितिया पदाधिकारी नापया खँल्हाबंलाय् प्रधानमन्त्री नेपालं प्रमुख प्रतिपक्ष दल एनेकपा (माओवादीं) सरकार परिर्वतनया हल्ला यानाः जनताय् भ्रम ब्वलंकूगु द्वपं बियादिल । वय्कलं थ्वहे सरकारं संविधान जारी याइगु दावी यानादिल ।
प्रधानमन्त्री निवास बालुवाटारय् जूगु खँल्हाबंलाय् वय्कलं माओवादी लडाकुया पुनःस्थापना व समायोजन लछिया दुने यायेगु कार्ययोजना थःम्हं न्ह्यब्वयाःगु खँ धयादिसें उकी माओवादी गम्भीर मजूगु द्वपं बियादिल ।
माओवादी लडाकुयात विस्तृत शान्ति सम्झौता कथं समायोजन यायेगु धयादिसें प्रधानमन्त्री नेपालं माओवादीं न्ह्यब्वःगु प्रस्ताव सम्भव मजूगु धयादिल । माओवादीं राजनीतिलय् वने चाहे जूपिं लडाकुयात नीगू लख व थाय् स्वयाः न्यागू निसें झिगू विघा जग्गा बीमाःगु प्रस्ताव तःगु खः ।
