प्रधानमन्त्रीं तत्काल राजीनामा बीमाः : यादव
मधेसी जनअधिकार फोरमया अध्यक्ष उपेन्द्र यादवं प्रधानमन्त्री माधवकुमार नेपाल नेतृत्वया सरकार देशय् जक मखसें विदेशय् नं बदनाम जूगु खँ धायदीगु दु । वय्कलं थंज्याःगु बदनामी पाखें बचे यायेत प्रधानमन्त्री नेपालं तत्काल राजीनामा बीमाःगु धयादिल ।
फोरमं वर्तमान सरकारया विरुद्ध यानाच्वंगु आन्दोलनया झ्वलय् धनुषा थ्यंकादीम्ह यादवं शुक्रवाः सुथय् पत्रकारत नाप खँल्हाबंला यानादिसें दाता राष्ट्रत नापं शान्ति प्रकृयाय् ग्वाहालि यानाच्वंगु युएन थंज्याःगु अन्तर्राष्ट्रिय निकायतय्सं वर्तमान सरकारया बारे नकारात्मक टिप्पणी यायेधुंकूगुलिं वर्तमान सरकारया बदनामी अन्तर्राष्ट्रिय क्षेत्रय् तकं जुइधुंकूगु दावी यानादिल ।
वय्कलं वर्तमान सरकारं देशय् शान्ति सुव्यवसस्था कायम यायेमफुगु व थ्व सरकारं संविधान जारी यायेमफइगु दावी नं यानादिल । वय्कलं वर्तमान सरकारं संविधानसभा व संवैधानिक समिति स्वयां च्वयय् वनाः ज्या यानाच्वंगु द्वपं बियादिसें सरकारं लोकतान्त्रिक पद्यतिया अवहेलना याःगु द्वपं बियादिल ।
देय्या प्रतिष्ठानाप स्वाःगु राहदानी छपाईलय् सरकारं व्यापक अनियमितता याःगु धयादिसें यादवं देय्या यावत समस्या समाधानया मुख्य बाधक प्रधानमन्त्री नेपाल स्वयं जूगु धयादिल । वय्कलं शान्ति सुरक्षा, इलय् हे संविधान जारी यायेगु, सेना समायोजन, मधेसीत नाप जूगु च्यागू बुँदे सम्झौताया कार्यान्वयन सहितया न्युनतम मुद्दाया आधारय् न्हूगु राष्ट्रिय सरकार गठन यायेमाःगु धयादिल ।
