बर्दिया गोली काण्डय् सेना दोषी : आयोग

बर्दिया राष्ट्रिय निकुञ्ज दुने कउलो काःवंपिं निम्ह मिसा व छम्ह मचाया हत्यय् सेना दोषी जूगु प्रतिवेदन मानव अधिकार आयोगं सार्वजनिक याःगु दु । वंगु फागुन २६ गते सुर्खेतया हरिहरपुर कप्सरे गांया देवसरा विक, अमृता विक व मचा चन्द्रकला विकायात बर्दिया राष्ट्रिय निकुञ्जया बाँसपानी इलाकाय् सेनां गोलीं क्येका: स्या:गु खः ।

उगु घटनाया छानबिन लिपाः आयोगं तयार याःगु प्रतिवेदन बिहीवाः सार्वजनिक यासें उगु घटनायात नेपाली सेनां ब्येक्वयेका व्याख्य याःगु द्वपं ब्यूगु दु । सेनां बिस्यूमवनेत इनाप याःसां प्रतिकार यायेत स्वःगुलिं आक्रमण यायेमाःगु खँ धाःगु खः । सेनां सीपिं पाखें स्वपू बन्दुक व खुकुरी नापं जफत याःगु जानकारी ब्यूगु व उकीया फोटो नापं सार्वजनिक याःगु खः । तर आयेगया अध्ययन प्रतिवेदनं ल्वाभः नियोजित रुपय् तयाः फोटो काःगु खँ न्ह्यथंनातःगु दु ।

अथेहे उगु घटनाय् सेनाया गस्ती पुचलं सीपिंत नियन्त्रणय् कायेगु पर्याप्त अवस्था दुगु खःसां छुं नं कुतः मयासें गोलीं क्येकूगु व गोलीं क्येकेगु स्वयां न्ह्यः ल्ह्वनेमाःगु छुं नं पलाः मल्ह्वंगु खँ प्रतिवेदनय् धयातःगु दु । नापं प्रतिवेदनय् सेनां अत्याधिक बल छ्यला स्वम्हेसित ल्यूनें गोलीं क्येकाः स्याःगु खँ न्ह्यथंनातःगु दु ।

थीथी ख्यलय् स्वम्हेसित सेनां बलात्कार यानाः स्याःगु द्वपं ब्यूसां आयोगया प्रतिवेदनय् उकीया छुं नं प्रमाण मलूगु खँ धाःगु दु ।

आयोगं घटनाय् संलग्न ज्वालदल गणया उप सेनानी सुवोध कुँवर सहितया सेनायात नियमित अदालय् फौजदारीया मुद्दा चले यायेत नं सिफारिस याःगु दु । अथेहे पीडित छेँजःयात स्वंगू लख व सीपिनि मस्तय्त राज्यया पाखें निशुल्क शिक्षा उपलब्ध यायेत नं सिफारिस याःगु दु ।