गिरिजाबाबुप्रति थौं देय्न्यकं श्रद्धाञ्जली
येँ (सन्ध्या टाइम्स)/पुलांम्ह प्रधानमन्त्री नापं नेपाली कांग्रेसया सभापति गिरिजाप्रसाद कोइराला मदुगु थौं झिंस्वन्हुया पुण्यतिथिस कांग्रेसं देय्न्यकं थीथी कथंया ज्याझ्वः यानाः श्रद्धाञ्जली प्वंकेगु ज्या यानाच्वंगु दु ।
कांग्रेसया देय्न्यंकंया जिल्ला कमिटी नापं थीथी भ्रातृ संगठनतपाखें मदुम्ह कोइरालाया लुमन्तिइ थीथी ज्याझ्वः यानाः थ्व श्रद्धाञ्जली प्वंकाच्वंगु खः। नेपाल विद्यार्थी संघं नं थौं सुथंनिसें थीथी क्याम्पसय् मदुम्ह कोइरालाया किपाय् स्वां छानाः वय्कःया योगदान लुमंकूगु खः। थ्वहे दथुइ कोइरालाया छेँजःपिंसं येँया पशुपति बनकाली हंसमण्डपय् पुण्यतिथिया ज्याझ्वः याःगु दु। सुथय् ११ बजेनिसें सनिलया ४ बजे तक जुइगु उगु ज्याझ्वलय् राष्ट्रपति, उपराष्ट्रपति, प्रधानमन्त्री, मन्त्रीत, थीथी राजनीतिक दलया नेता नापं थीथी ख्यःया मनूतय्सं ब्वति कयादी। उगु ज्याझ्वलय् विदेश कूटनीतिक नियोगया प्रतिनिधितय्सं २ बजे लिपा अन वनी धकाः धाःगु दु। पुण्यतिथिइ ब्वति कायेगु निंतिं भूटानी प्रधानमन्त्री जिग्मे वाङचुक थिन्ले थौं नेपाः झायेत्यंगु दु। स्वनिगलय् मंकाः कथं वइगु शनिवाः जक श्रद्धाञ्जली सभा यायेगु ग्वसाः ग्वयातःगु दु ।
कांग्रेस सभापति कोइराला ८७ दँय् वंगु चैत्र ७ गते मदुगु खः ।
