थनिंनिसें साधारण पासपोर्ट वितरण बन्द
येँ (सन्ध्या टाइम्स)/सरकारं थनिंनिसें ल्हातं च्वयाः बीगु पासपोर्ट वितरण बन्द याःगु दु। मेशिन रिडेबल पासपोर्ट (एमआरपी) जारी यायेगु ल्याखं ल्हातं च्वयाः बीगु पासपोर्ट वितरण बन्द याःगु खः ।
तर सरकार व संसदीय व्यवस्थाया लेखा समितिया दथुइ ब्वलनाच्वंगु विवादया कारणं एमआरपी धाःसा अझं थ्यंकः मवःनि। एमआरपी थ्यंकः मवःसां थनिंनिसें पुलांगु पासपोर्ट वितरण धाःसा बन्द याःगु खः। एमआरपी छापे यायेत लिबाःगु कारणं झण्डै निला स्वयां अप्वः ईया निंतिं पासपोर्ट वितरया बन्द जुइगु जूगु दु ।
नेपालं जारी यायेत्यंगु एमआरपी भारतय् छापे जुयाः वयेत म्होतिं नं निलां मल्याक ई काइगु मन्त्रालयं न्ह्यथंगु दु।
अन्तर्राष्ट्रिय नागरिक उड्डयन संगठनं थनिंनिसें विश्वन्यंकं मेशिन रिडेबल पासपोर्ट प्रचलनय् हयेत्यंगु खः। तर नेपालय् सरकारया ढिलासुस्ती व अदूरदर्शीताया कारण एमआरपी जारी जुइत अझं छुं ई काइगु जूगु दु ।
लेखा समितिं प्रतिपर्स्धाया माध्यमं एमआरपी छापे यायेत निर्देशन बिउगु खःसां सरकारं धाःसा यकःति रुपं एमआरपी भारतय् छापे याकेगु निर्ण याःगु खः। थ्व हे खँया कयाः सरकार व समिति दथुइ विवाद नं ब्वलनाच्वंगु खः ।
