थिन्लें प्रधानमन्त्री नेपाल नापलात
नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालाया झिंस्वन्हुया पुण्यतिथिलय् ब्वति कायेत येँय् झायादीम्ह भुटानी प्रधानमन्त्री जिग्मे वाङचुक थिन्लें प्रधानमन्त्री माधवकुमार नाप खँलहाबंला यानादीगु दु ।
खँल्हाबंलाया झ्वलय् प्रधानमन्त्री नेपालं ताः ई न्ह्यः निसें नेपालय् दुपिं भुटानी शरणार्थीतय् भुटान लिहांवनेदइगु अधिकारयात उमिगु मानव अधिकार कथं थुइकेत इनाप यानादिल । वय्कलं शरणार्थीतय्त स्वंगूगु मुलुकय् पुर्नस्थापना यानाः जक समस्या समाधान मजुइगु धयादिसें उमित ससम्मान देय् लिहांवनेगु वातावरण मिले यायेत भुटानी प्रधानमन्त्री थिन्लेयात इनाप यानादिल ।
थिन्लें शरणार्थीतय्त स्वंगूगु मुलुकय् पुर्नस्थापना यायेगु ज्या सन्तोषजनक रुपं न्ह्याः वनाच्वंगु धयादिसें भुटान व नेपाः नापं अन्तर्राष्ट्रिय समुदायया समन्वयय् शरणार्थी समस्यायात समाधान यायेगु विषयलय् खँलहाबंला न्ह्याकेगु धयादिल ।
प्रधानमन्त्री नेपाल नापया खँलहाबंलाया झ्वलय् थिन्लें भुटानय् जुइगु सार्क शिखर सम्मेलनया तयारी बारे जानकारी बियादीगु व उगु सम्मेलनय् ब्वति कायेत नं ब्वानादीगु खँ प्रधानमन्त्रीया विदेश मामिला सल्लाहकार राजन भट्टराईं कनादिल ।
