अनमिनया बारे सहलह लिपाः निर्णय : प्रम
प्रधानमन्त्री माधवकुमार नेपालं नेपाः स्थित संयुक्त राष्ट्रसंघीय मिसन अनमिनया म्याद तनेगु बारे राजनीतिक दलत नाप सहलह यानाः निर्णय यायेगु खँ धयादीगु दु ।
न्हापा अनमिनया म्याद मतनेगु बिचाः तयादीम्ह प्रधानमन्त्री नेपालं बिहीवाः संयुक्त राष्ट्रसंघया एसिया प्यासेफिक निर्देशक तम्राट स्यामुअल व अनमिन प्रमुख करिन ल्यानग्रेन नापया खँल्हाबंलाय् थंज्याःगु खँ धयादीगु खः । लिसलय् तम्राटं नेपालय् अनमिनया प्रगति खनेदु कथं मजूगु खःसा म्याद तनेम्वाःगु खँ धयादिल ।
अथेहे खँल्हाबंलाय् प्रधानमन्त्री नेपालं वर्तमान सरकार शान्ति प्रकृया क्वचायेकाः इलय् हे संविधान जारी यायेत प्रतिबद्ध जूगु धयादिसें थुगु ज्या पूवंकेत दक्वं दलनाप सहमति यानाः न्ह्याः वनेगु धयादिल ।
थ्वस्वयां न्ह्यः बिहीवाः सुथय् नेकपा (एमाले)या अध्यक्ष झलनाथ खनालयात नं निर्देशक तम्राट व ल्यानग्रेनं नापलानादीगु खः । उगु इलय् खनालं राष्ट्रिय सहमति कथं न्ह्याः वनेगु थौंया आवश्यकता जूगु धयादिसें दलत दथुइ गम्भीर रुपं सहलह जुयाच्वंगुलिं राजनीतिक गतिरोध याकन हे क्वचाइगु दावी यानादिल ।
