क्षेत्री व ब्राम्हण समाज षड्यन्त्र पाखे : अनन्त
एकीकृत नेकपा (माओवादी)या स्थायी समिति दुजाः वर्षमान पुन 'अनन्तं' क्षेत्री व ब्राम्हण समाजया नांमय् जातिय सद्भाव स्यंकाः राजतन्त्र व हिन्दु राज्य स्थापना यायेगु षड्यन्त्र जुयाच्वंगु खँ धयादीगु दु ।
बुधवाः आदिवासी जातिय क्षेत्रीय महासंघया सभायात पोखराय् सम्बोधन यानादिसें वय्कलं जातिय देय् दयेकूसां उकीं नेपा:या समाजयात खण्डित यायेमज्यूगु धयादिल । क्षेत्री व ब्राम्हण समाजं जातिवादी व साम्प्रदायिकता ब्वलंकेत स्वयाच्वंगु द्वपं नेता अनन्तं बियादिल । अथेहे वय्कलं अज्याःगु संठनं 'तछ्याः व शासन या' धइगु नीति ज्वंगुलिं राजतन्त्रयात हानं म्वाकेमाः धइपिंत ग्वाहालि जूगु धयादिल ।
माओवादी नेता अनन्तं बहुजातिय, भाषा, क्षेत्र, वर्ग लगायतया विशेषताया आधारय् राज्यया पुनर्संरचना यायेमाःगु खँय् बः बियादिसें संघीय राज्ययात आत्मनिर्णयया अधिकार बीयाः दक्वं प्रकारया उत्पीदनया अन्त्य यायेमाःग बिचाः प्वंकादिल ।
