बिहीवाः निसें शिक्षण अस्पताल चालिगु
न्याम्ह दुजः दुगु छानबिन समिति गठन
झिंच्यान्हु न्ह्यः निसें चिकित्सकतय् आन्दोलनया कारणं बन्द जुयाच्वंगु शिक्षण अस्पताल बिहीवाः निसें चालिगु जूगु दु ।
अस्पताल चायेकेगु विषयलय् बुधवाः शिक्षामन्त्री सर्वेन्द्रनाथ शुक्ला व आन्दोलनरत चिकित्सकत दथुइ जूगु वार्ताय् स्नातकोत्तर प्रवेश परीक्षाया बारे छानबिन यायेत छगू छानबिन समिति गठन यायेवं अस्पताल चायेकेत चिकित्सकतय्सं सहमति प्वंकूगु खः ।
सरकारं थुकीया बारे छानबिन यायेत पुलांम्ह शिक्षा सचिव जयराम गिरिया संयोजकत्वय् न्याम्ह दुजः दुगु छानबिन समिति गठन याःगु दु । उगु समितियात झिंन्यान्हुया दुने सत्यतथ्य छानबिन यानाः प्रतिबेदन लःल्हायेगु जिम्मा ब्यूगु दु ।
आन्दोलनरत चिकित्सकतय्सं प्रवेश परीक्षाय् डिन अरुण सायमीं छगू करोड स्वयां अप्वः ध्यबा कयाः प्रश्नपत्र पिने छ्वःगु धासें झिंच्यान्हु न्ह्यः निसें चिकित्सकतय्सं आन्दोलन यानाच्वंगु खः । आन्दोलनया कारणं आकस्मिक सेवा तकं बन्द जुइवं आपलं बिरमीत प्रभावित जूगु खः ।
