थौं देय्न्यंकं संघीयता विरोधी विरुद्ध प्रदर्शन
येँ (सन्ध्या टाइम्स)/एनेकपा (माओवादी)या आदिवासी जातीय क्षेत्रीय महासंघं थौं संघीयता विरोधीतय् विरुद्ध देय्न्यंकं प्रदर्शन याइगु जूगु दु ।
देशय् संघीयता व धर्म निरपेक्षताया विरोधय् प्रतिगामीतय्सं चलखेल अप्वयेका हःगु कारणं इमिगु विरोधय् शक्ति क्यनेगु नापं क्वःछिनातःगु इलय् हे संविधान जारी याकेगु निंतिं थौं प्रदर्शन यायेत्यनागु खँ उगु महासंघया मूछ्याञ्जे नापं सभासद सुरेश आलेमगरं कनादीगु दु। जातीय व क्षेत्रीय आधारय् राज्यया पुनर्संरचना याये मजिउ अले नेपाःयात हिन्दू राष्ट्र हे दयेकेमाः धकाः प्रतिगामीतय्सं चलखेल यानाच्वंगुलिं हे थःपिं बाध्य जुयाः इमित खबरदारी यायेत नापं धर्म निरपेक्षता व जातीय क्षेत्रीय आधारय् राज्य पुनर्संरचना यायेमाः धकाः थौं प्रदर्शन यायेत्यनागु खँ नं वय्कलं कनादिल। थौंया प्रदर्शनय् माओवादीया जातीय क्षेत्रीय मोर्चाया नेता व कार्यकर्ता नापं संघीयता, धर्म निरपेक्षताया पक्षय् दुपिं सकस्यां ब्वति काइगु खँ नं वय्कलं कनादिल। येँया रत्नपार्कय् सनिलया २ बजे मुनाः जुलुस पिकासें येँ देय् चाःहिलाः बसन्तपुली थ्यंकाः छगू सभा याइगु ज्याझ्वः दु। उगु सभाय् मू पाहांकथं एनेकपा (माओवादी)या महासचिव रामबहादुर थापा बादल नापं मेमेपिं नेतातय्सं नं संवोधन यानादीगु ग्वसाः दु ।
थौं येँय् थें इलाम, विराटनगर, पोखरा, सुर्खेत, धनगढी व मेमेगु थासय् नापं यानाः मुक्कं झिंन्हय्गू थासय् प्रदर्शन यायेगु तयारी जुयाच्वंगु खँ आदिवासी जातीय क्षेत्रीय महासंघं धाःगु दु ।
