ल्याय्म्हतय्त संघीयताया प्रशिक्षण

येँ (सन्ध्या टाइम्स)/बौद्ध युवा कमिटी यलं कुमारीपाटीस्थित युनिक कलेजय् ग्वसाः ग्वःगु 'संघीयता झीगु सरोकार' विषयक अन्तर्क्रियाय् नेवाः भाषिक व जातीय आन्दोलनका न्ह्यलुवा मल्ल के. सुन्दरं ल्याय्म्ह विद्यार्थीतय्सं संघीयताया थीथी पक्षय् प्वंकूगु जिज्ञासाया लिसः बियादिल। ज्याझ्वलय् न्ववासें भाजु मल्लं मुलुक संघीयताय् वन धाःसा देय् कुचा जुइ धइगु निरर्थक हल्ला जक जूगुलिं संघीयतां जक दक्व भाषाभाषी व जातजातिलाई पहिचान सहित राज्य सत्ताय् पहुँच दयेका बी धयादिल। नेपाली राज्यया स्वरुप विभेदकारी व एकात्मक जूगुलिं सलंसःदँनिसें छगू भाषा, छगू संस्कृति र छगू क्षेत्र बाहेक बहुसंख्यक नेपालीत विकासया मुलधारं पिने लानाच्वंगु जूगुलिं उकियात संवोधन यायेत हे संघीयताय् वनेमाःगु खः धकाः नं वय्कलं धयादिल। वय्कलं जातीय आधारय् बने जुइगु संघीय राज्यय् अनेक हाथ्यात दुसां उकियात सही तरीकां व्यवस्थापन याये फत धाःसा उकिं खास हे समस्या मजुइगु बिचाः नं प्वंकादिल। नेवाः राज्यया मुख्य स्रोत धइगु सांस्कृतिक सम्पदा, पर्यटन, उद्योग व्यवसायपाखें वइगु राजस्व व मानवीय स्रोत खः धासें मगाःगु स्रोत व साधन मेगु प्रदेशं आयात यायेगु व दुगु मी फइगु खँ कनादिल ।

जातीय आधारय् बने जुइगु राज्यय् छगू जातिं मेगु जातियात अन्याय, दमन जुइ मखु धासें वय्कलं संघीय राज्यय् सकस्यां समानुपातिक प्रतिनिधित्व व समावेशी जुइगु जुयाः सुयातं अन्याय जुइ मखु धयादिल ।

ज्याझ्वलय् न्ववासें कमिटीया अध्यक्ष रविन्द्र शाक्यं थौंया युवापुस्ताय् फयांफछि अप्वः मनोरञ्जनपाखे जक लगे जुइगु प्रवृत्ति अप्वयाच्वंगु खँय् चिउताः प्वंकुसें युवावर्गं पढाईया अतिरिक्त समसमायिक विषयय् छलफल यायेगु, चिन्तन यायेगु संस्कार विकास यायेमाः धयादिल ।