बाल क्लबयात सिरपाः
येँ (सन्ध्या टाइम्स)/कन्सर्न नेपाल कार्यरत जुयाच्वंगु काभ्रेया चलाल गाविसय् सक्रिय गिटी तछ्याइगु बालबालिकाया शैलेश्वरी बाल क्लबं काभ्रेव्यापी उत्कृष्ट बाल क्लबया सिरपाः त्याकूगु दु। काभ्रे जिल्ला बाल कल्याण समितिपाखें ग्वसाः ग्वःगु छगू ज्याझ्वलय् संयुक्त राष्ट्र संघीय बाल अधिकार आयोगया अध्यक्ष डा. याङ्ग ली व उपाध्यक्ष जोन जमाटां उगु सिरपाः लःल्हानादीगु खः ।
सिरपाः लःल्हानाः कासें क्लबया अध्यक्ष सिताष्मा महतं थ्व सिरपालं थःपिनि हौसला अझ अप्वयेका बिउगु दु धयादिल।
राष्ट्र संघया वय्कः पदाधिकारीपिं नेपाः भ्रमणय् दी। थ्व झ्वलय् बालबालिका सम्बन्धी गैससतय् छगू भेलाय् न्ववासें वय्कःपिंसं नेपालय् बालअधिकार पालना यायेगु सन्दर्भय् सरकारी पक्षया कमजोरीत दुगु खँ कनादिल। ज्याझ्वलय् कन्सर्नया विजय सैंजुं, दिपक सापकोटा, शिव पौडेलपिंसं नं न्ववानादीगु खः ।
