टेलिकमया लबः २५ प्रतिशत थहां वन
प्रति कित्ता शेयर ३५/- लाभांश इनाबीगु
येँ (सन्ध्या टाइम्स)/नेपाल टेलिकमं वंगु दँया तुलनाय् थुग दँया कूल आम्दानीइ नीन्यागू प्रतिशतं थहां वंगु जानकारी बिउगु दु। टेलिकमया आः नकतिनि क्वचाःगु निक्वःगु साधारण सभाया झ्वलय् थुगु जानकारी बिउगु खः ।
वंगु सोमवाः क्वचाःगु टलिकमया साधारण सभाय् थगुने स्वयां नीनिगू अर्ब झिंन्यागू करोड आम्दानी याःगु खःसा खूद नाफा नं थगुने स्वयां थुगुसी स्वीछगू प्रतिहतं थहां वनाः झिगू अर्ब झिंच्यागू करोड थ्यंगु जानकारी बिउगु दु ।
टेलिकमया उगु साधारण सभां आर्थिक दँ ०६५/६६या लबःपाखें कम्पनीया साधारण शेयर धनीतय्त प्रति कित्ता शेयरया ल्याखं स्वीन्यातका लाभांश बीगु प्रस्तावयात नं पारित याःगु दु ।
साधारण सभाय् न्ववायेगु झ्वलय् संचालक समितिया अध्यक्ष सुशील घिमिरें कुहां वनाच्वंगु देय्या समसामयिक राजनीतिक परिस्थिति, कमजोर सुरक्षा व्यवस्था, उर्जा व इन्धन संकट, अस्थिर बजार भाःया कारणं देय्या अर्थतन्त्र हे प्रभावित जुयाच्वंगु इलय् नं टेलिकम धाःसा वित्तीय क्षेत्रय् सफल जूगु व ग्राहकतय्त नं सेवा बीत सफल जूगु देय्या हे छगू जक उत्कृष्ट सेवा प्रदायक कम्पनीया रुपय् टेलिकमं थःत स्थापित यायेत सफल जूगु बिचाः प्वंकादिल ।
अन्तर्राष्ट्रिय स्तरय् दूरसंचारया क्षेत्रय् न्हू न्हूगु प्रविधि व उपकरण दुहां वयाच्वंगुलिं व बजारय् आन्तरिक थप सेवा प्रदायक कम्पनीया सेवां यानाः थ्व क्षेत्रय् तःधंगु हाथ्या दंवःगु धासें थज्याःगु हाथ्याया दथुइ नं टेलिकमं थःगु सेवाय् निरन्तरता बिया वयाच्वनागु दावी यासे वय्कलं लिपाया निंतिं थज्याःगु उपकरण व प्रविधिइ टेलिकमं नं लगानी यायेमाःगु आवश्यकता महसुस यानादिल ।
छखे टेलिकमं थःपिनिगु सुविधा स्तरीय जुया वनाच्वंगु दावी याःगु दुसा उखे साधारण शेयरधनीतय्सं टेलिकमया सेवा सुधारया पलेसा स्तर कुहां वनाच्वंगु खँ धाःगु दु ।
शेयरधनीतय् द्वपंयात तप्यंक स्वीकार मयाःसां टेलिकमं मोबाइलया स्तर सुधार यायेत व्याट्री व सोलार उर्जाशक्तियात विकल्प बीत व विद्युत आपूर्तिया इलय् नेटवर्किङ्गय् खने दयाच्वंगु समस्यायात ज्यंकेगु निंतिं प्राधिकरण नापं नं सहकार्यया जलविद्युत क्षेत्रय् नं लगानीया वातावरण विस्तार यायेगु नीति कयागु जानकारी बिउगु दु ।
वंगु छुं दिं न्ह्यव जक नेपाल टेलिकमया थुगु साधारण सभा दिकेत टेलिकम शेयर सरोकार समुहं माग याःगु खः ।
