राज्या पुनर्संरचना आयोग गठन यायेत स्वंगू दल सहमत
इलय् हे संविधान निर्माण यायेगु प्रतिबद्धता
उच्चस्तरीय राजनीतिक संयन्त्रलय् दुथ्याःगु स्वंगू प्रमुख दल एकीकृत नेकपा (माओवादी), नेपाली कांग्रेस व नेकपा (एमालें) राज्य पुनर्संरचना आयोग गठन यायेत नीतिगत सहमति याःगु दु । संयन्त्रया बुधवाः च्वंगु बैठकय् जेठ १४ गते हे संविधान जारी यायेगु कथं राज्य पुनर्संरचनाय् खनेदुगु विवाद चीकेगु निंतिं आयोग गठन यायेत सहमति याःगु खः ।
थ्वस्वयां न्ह्यः माओवादीं आयोग गठन यायेत असहमति प्वंकाच्वंगु खःसां बुधवाःया बैठकय् माओवादीं नं थुकी सहमति प्वंकूगु दु । अन्तरिम संविधान व संविधानसभा अर्न्तगतया राज्या पुनर्संरचना समितिया प्रतिवेदयात ध्यानय् तयाः विज्ञत नाप थप परामर्श लिपा अयोगं प्रतिवेदन तयार याइ । संविधानसभाया विषयगत समितिया प्रस्तावय् प्राविधिक ग्वाहालि यायेत गठन यायेत्यंगु उगु आयोगया क्षेत्राधिकार बारे शुक्रवाःया संयन्त्रया बैठकं क्वःछिगु खँ माओवादी उपाध्यक्ष नारायणकाजी श्रेष्ठ 'प्रकाशं' कनादिल ।
बैठकय् थीथी ख्यः पाखें संघीय लोकतान्त्रिक गणतन्त्र, धर्म निरपेक्षता, न्हूगु संविधान लगायत विषयलय् वयाच्वंगु अभिव्यक्ति प्रति स्वंगूलिं दलं आपत्ति प्वंकूसें थुकीया विरुद्ध दलत छप्पँ जुयाः न्ह्याः वनेगु सहमित प्वंकूगु दु । एमाले अध्यक्ष झलनाथ खनालं दक्षिणपन्थी व पुनरुत्थानवादी गठबन्धन पाखें वयाच्वंगु अभिव्यक्ति विरुद्ध स्वंगू दल एकताबद्ध जुया दक्वं लोकतान्त्रिक शक्ति व लोकतान्त्रिक पार्टीयात नं एकताबद्ध यानाः न्ह्याः वनेगु कनादिल ।
बैठक लिपाः माओवादी अध्यक्ष पुष्पकमल दाहाल 'प्रचण्ड', कांग्रेस कार्यवहाक सभापति सुशिल कोइराला व एमाले अध्यक्ष खनालं छगू मंकाः विज्ञप्ति पिथनादिसें लोकतान्त्रिक व अग्रगामी परिवर्तनया हिकेत स्वइपिं प्रतिगामी तत्वपाखें थंज्याःगु कुत: जुयाच्वंगु धासें थंज्याःगु षड्यन्त्रयात एकताबद्ध जुयाः असफल यायेगु खँ न्ह्यथंनातःगु दु । अथेहे विज्ञप्तिइ जेठ १४ गते दुने संविधान जारी यायेगु प्रतिबद्धता सहित गणतन्त्र, धर्म निरपेक्षता व संघीयता विरुद्ध वःगु अभिव्यक्तिया मंका: प्रतिवाद यायेगु खँ धयातःगु दु ।
अथेहे बैठकय् माओवादीं सरकारं मेसिन रिडेवल पासपोर्ट (एमआरपी) भारतयात छापे याकेब्यूगु खँ प्रति आपत्ति प्वंकूगु खः । लिसःलय् कांग्रेस व एमाले नेतातय्सं नं उगु निर्णय प्रति असन्तुष्टि प्वंकूगु खँ माओवादी उपाध्यक्ष श्रेष्ठं कनादिल ।
