शान्ति सम्झौता विपरीत सेनाय् न्हू भर्ती : गजुरेल
एकीकृत नेकपा (माओवादी)या नेता सिपी गजुरेलं नेपालीं सेनां शान्ति सम्झौता विपरीत हानं सेनाय् न्हूगु भर्ती यायेत्यंगु द्वपं बियादीगु दु ।
क्रान्तिकारी पत्रकार संघं बुधवाः मोरङय् ग्वसाःग्वःगु पत्रकार सम्मेलनय् वय्कलं शान्ति सम्झौताय् नेपाली सेना व माओवादी लडाकुतय्सं न्हूगु भर्ती यायेमदइगु खँ न्ह्यथंनातःगु धयादिसें सेनां थुकीया अखः न्हूगु भर्ती यायेत्यंगु धयादिल । वय्कलं माओवादीया सहमति बिना सेनां गु नं हालतं न्हू भर्ती यायेमदइगु धयादिल ।
अथेहे वय्कलं सेनां च्याद्वं ला: छु च्याम्ह नं न्हू सेना भर्ती यायेमदइगु धयादिल । नेता गजुरेलं सेनां न्हू भर्ती याये थें माओवादीं नं न्हू भर्ती याःसा छु जुइ धकाः न्ह्यसः तयादिल । वय्कलं धयादिल, 'सेनां च्याद्वं न्हू भर्ती याथें माओवादीं नीद्वं याःसा छु जुइ?'
ज्याझ्वलय् वय्कलं नेपाःया शान्ति प्रकृया पूमवंतल्ले अनमिनया भूमिका आवश्यक जूगु धयादिल । वय्कलं शान्ति प्रकृयायात ग्वाहालि याःगु अनमिनया म्याद विदेशी इशाराय् सरकारं थप मयायेगु षड्यन्त्र यानाच्वंगु द्वपं बियादिल । नापं वय्कलं अनमिन छुयां अभिष्ट पूवंकेगु निंतिं छ्यले मज्यूगु धयादिल ।
