सरकारं झिंखुम्हेसित सहिद घोषणा
औद्योगिक सुरक्ष बला गठन यायेगु सहमित
सरकारं मधेश आन्दोलनय् सीपिं थप झिंखुम्हेसित सहिद घोषणा याःगु दु । मधेशवादी दलतय्सं मधेश आन्दोलनय् सीपिंत सहिद घोषणाया माग यानाः आन्दोलन यायेगु ख्याच्वः बीवं मंगलवाः च्वंगु मन्त्रिपरिषदया बैठकं थप सहिद घोषणा याःगु खः । थ्व घोषणा नापं मधेश आन्दोलनय् सहिद जूपिनि ल्या पीम्ह थ्यंगु दु । थ्वस्वयां न्ह्यः हे सरकारं नीप्यम्हेसित सहिद घोषणा यायेधुकूगु खः ।
अथेहे सरकरां औद्योगिक सुरक्षा बल गठन यायेगु विषयलय् सैद्धानितक सहमति याःगु खँ सूचना व संचार मन्त्री शंकर पोखरेलं कनादिल । शान्ति सुरक्षा व औद्योगिक समस्या समाधान यायेत उद्योग व्यवसायीतय्सं माग याःगु कथं सरकारं थ्व निर्णय याःगु खः ।
बैठकं संचार उद्यमी जमिम शाया हत्याया छानविन समितिया म्याद झिंन्यान्हु थप या:गु दुसाः स्थानीय शान्ति समितिया म्याद दछि थप याःगु दु । अथेहे बैठकं बाराया कनिपीडित किसानतय्त स्वीगू करोड ध्यबा राहत बीगु घोषणा याःगु दु ।
मन्त्रिपरिषद्या बैठकं स्ववियु निर्वाचनया इलय् झापाय् सीम्ह संघीय लिम्बूवान परिषदया कार्यकर्ता मनिल तामाङया छेँजःयात झिगू लख बीगु निर्णय नं याःगु दु ।
