'इलय् हे संविधान निर्माण'
संविधान निर्माणया ई सतिनाच्वंगु इलय् थीथी दलया शीर्ष नेतातय्सं वइगु जेठ १४ गते हे न्हूगु संविधान जारी जुइगु खँ धाःगु दु ।
मंगलवाः रिपोटर्स क्लबया झिंनिदँया वार्षिक समारोहय् न्ववानादिसें संविधानसभाया अध्यक्ष सुवासचन्द्र नेम्वाङं सहमति, सहकार्य व एकताया माध्यमं दलत न्ह्याः वनेमाःगु खँय् बः बियादिसें दलत छप्पँ जुयाः ज्या याःसा इलय् हे संविधान निर्माण यायेत सम्भव जूगु धयादिल ।
ज्याझ्वलय् एनेकपा (माओवादी)या अध्यक्ष पुष्पकमल दाहाल 'प्रचण्डं' राजनीतिक दलत दथुइ याकनं हे सहमति जुइगु विश्वास प्वंकादिसें सहमति लिपाः इलय् हे संविधान निर्माण जुइगु धयादिल । वय्कलं दलत दथुइ सहमति मजुयाः प्रतिगामी शक्तितय्सं देशय् चलखेल शुरु याःगु धयादिसें आः देय् पुलांगु अवस्थाय् हे लिहांमवनीगु धयादिल । नापं वय्कलं सहमति व संविधान निर्माणया निंतिं माओवादीं थप लचकता क्यनीगु धयादिल ।
अथेहे नेकपा (एमाले)या अध्यक्ष झलनाथ खनालं संविधान च्वयेगु ज्याः आः नीगू प्रतिशत जक ल्यं दनीगु धयादिसें इलय् हे संविधान निर्माण जुइगु दावी यानादिल । वय्कलं च्यय्गू प्रतिशत संविधान च्वये धुंकूगु व आः ल्यं दनीगु हरेक दिंया कार्यतालिका दयेकाः ज्या यायेमाःगु धयादिल ।
ज्याझ्वलय् संविधानसभाय् प्रतिनिधित्व याइपिं मेमेगू दलया शीर्ष नेतातय्सं दक्वसितं संविधान निर्माण यायेगु ज्याय् केन्द्रीत जुइत इनाप याःगु खः ।
