शिक्षण अस्पताल तत्काल चायेकेत प्रशासनया निर्देशन
अस्पतालया ज्या सुचारु यायेत त्रिविया इनाप
येँ जिल्ला प्रशासन ज्याकूथीं शिक्षण अस्पताल तत्काल चायेकेत कार्यकारी निर्देशकयात मंगलवा: पौ छ्वया निर्देशन ब्यूगु दु । अस्पताल बन्द यायेगु ज्या अत्यावश्यकीय सेवा सञ्चालन ऐन २०१४ विपरित जूगु धासें प्रमुख जिल्ला अधिकारी लक्ष्मीप्रसाद ढकालं उगु निर्देशन बियादीगु ख: । अस्पताल चायेकेगु निंतिं छुं कथंया ग्वाहालि मा:सा प्रशासनयात तत्काल जानकारी बीत नं पौलय् न्ह्यथनात:गु दु ।
उखे त्रिभुवन विश्वविद्यालयं नं शिक्षण अस्पतालय् आन्दोलन यानाच्वंपिं चिकित्सकतय्त आन्दोलन त्वःता ज्याये लिहां वनेत इनाप याःगु दु । त्रिविं मंगलवाः छगू विज्ञप्ति पिथनाः आन्दोलनरत पक्षं माग याःगु कथं स्नातकोत्तर तहया प्रवेश परीक्षा रद्द जुइधुंकूगु व हानं परीक्षा कायेत निर्देशन बीधुंकूगुलिं आन्दोलन त्वाःता ज्याय् लिहांवनेत इनाप याःगु दु । नापं त्रिविं ज्याय् लिहांवंसा सम्बन्धित पक्षयात कारवाही यायेगु ख्याच्वः तकं ब्यूगु दु ।
आन्दोलनरत पक्षं धाःसाः परीक्षा रद्द जुसां हानं पुलांगु हे व्यवस्थापन अर्न्तगत जुइगु परिक्षा निष्पक्ष मजुइगु धासें डिन, सहायक डिनं राजीनामा बीमाःगु अडान कयाच्वंगु दु । झिंन्हय्न्हू न्ह्यः निसें शिक्षण अस्पतालया सेवा बन्द जुइवं आपालं बिरामीत प्रभावित जूगु दु ।
