प्रम पाखें राजनीतिक व कुटनीतिकज्ञत नाप सहलह
प्रधानमन्त्री माधवकुमार नेपालं मंगलवाः नं थःगु परामर्श ज्याझ्वःयात निरन्तरता बियादीगु दु । वय्कलं मंगलवाः नेपाःस्थित थीथी देय्या राजदूत लगायत संविधानसभाय् प्रतिनिधित्व दुगु दलतय् नेतात नाप सहलह यानादीगु खः ।
प्रधानमन्त्री नेपालं समसामयिक राजनीतिक परिस्थितिया बारे नेपाल सद्भावना पार्टीया सरित गिरी, नेकपा (एकीकृत)या रामिसंह श्रीस व ऋषि कट्टेल, राप्रापा नेपालया अध्यक्ष कमल थापा, सभासद् विश्वनाथ अग्रवाल व सभासद् श्यामसुन्दर गुप्ता नाप बिस्कं बिस्कं नापलानादीगु खः ।
खँल्हाबंलाय् ब्वति काःपिं नेतातय्सं सरकारया ज्या यानाच्वंगु शैली प्रति असन्तुष्टि प्वंकूसें सरकारयात थःगु ज्या यायेगु शैली हिलेत इनाप याःगु दु ।
अथेहे वय्कलं मंगलवाः हे डेनमार्क, अमेरिका, फिनल्यान्ड, स्वीट्जरल्यान्ड, बेलायत नर्वे व जर्मनीया राजदूतत नाप खँल्हाबंला यानादीगु खः ।
उगु इलय् प्रधानमन्त्री नेपालं संयुक्त राष्ट्र संघीय मानव अधिकारसम्बन्धी उच्च आयुक्तया नेपाः स्थित ज्याकू ओएचसिएचआर व अनमिनया म्याद मतनेगु कथं खँ तयादीगु खः । राजदूततय्सं ओएचसिएचआरया म्याद दछि तनेत इनाप याःगु खःसां प्रधानमन्त्री नेपालं उकीया आवश्यक्ता पूवंगु संकेत यानादिगु खः ।
