राष्ट्रिय सरकार गठन यायेत निर्णायक पलाः : माओवादी
प्रमुख प्रतिपक्षी दल एनेकपा (माओवादीं) थःपिनिगु नेतृत्वय् राष्ट्रिय सरकार गठन यायेत मेमेगू दलयात निर्णायक पला: ल्ह्वनेत इनाप याःगु दु ।
मंगलवाः क्वचाःगु स्थायी समितिया बैठकं वइगु संसदया हिउँदे अधिवेशयात लक्षित यानाः राष्ट्रिय सरकारयात आत्मसाथ यानाः न्ह्याः वनेत औपचारिक रुपं इनाप याःगु दु । माओवादीं वर्तमान सरकार विस्थापित यानाः राष्ट्रिय सरकारयात आत्मसाथ याना: निर्णायक पलाः ल्ह्वनेत दलतय्त इनाप याःगु खँ उपाध्यक्ष नारायणकाजी श्रेष्ठ 'प्रकाशं' कनादिल ।
नापं माओवादीं थःगु नेतृत्वय् राष्ट्रिय सहमतिया सरकार गठनया निंतिं राजनीतिक सहलहयात निरन्तरता बीगु निर्णय याःगु दु । छुं दिं न्ह्यः निसें माओवादीं सत्तारुढ नेपाली कांग्रेस, नेकपा (एमाले), प्रतिपक्षी दल मधेशी जनअधिकार फोरम लगायत संविधानसभाय् दुथ्याःगु चीचीधंगु दलतनाप सहलह यानाच्वंगु दु ।
अथेहे माओवादी स्थायी समितिया बैठकं राष्ट्रिय स्वाधीनता, नागरिक सर्वोच्चताया निंतिं मंकाः मोर्चा दयेकेत बिचाः मिलेजूगु दल व संगठननाप वार्ता यायेगु निर्णय नं याःगु दु । थ्वस्वयां न्ह्यः सोमवाः च्वंगु बैठकं इलय् हे संविधान निर्माणया निंतिं युद्धस्तरय् न्ह्याः वनेगु निर्णय याःगु खः ।
