उद्योग व्यवसायीतय् माग पूवंकेत सरकारत प्रतिबद्ध : प्रम
प्रधानमन्त्री माधवकुमार नेपालं उद्योग व्यवसायीतय् माग पूवंकेत सरकार प्रतिबद्ध जूगु खँ धयादीगु दु । वय्कलं व्यवसायीतय् माग कथं शान्ति सुरक्षा लगायत उद्योगमैत्री वातावरण निर्माण यायेत सरकारं याकनं निर्णय यायेगु धयादिल ।
मंगलवाः नेपाल उद्योग वाणिज महासंघया प्रतिनिधमण्डल नापया खँल्हाबंलाय् प्रधानमन्त्री थंज्याःगु प्रतिबद्धता प्वंकादीगु खः । उगु इलय् अर्थ, गृह, ऊर्जा, उद्योग वाणिज्य व आपूर्तिमन्त्रीया नं ब्वति दुगु खः । सिंहदरवारय् जूगु सहलहलय् प्रधानमन्त्री नेपालं तत्काल औद्योगिक सुरक्षा वल गठन याःसां कार्यान्वयन यायेत छुं ई मालीगुलिं आःयात साधनस्रोत सहित प्रहरी प्रशासनयात थप सक्रिय यायेगु धयादिल ।
व्यवसायीतय्सं निजी क्षेत्रया समस्या समाधनया निंतिं सरकारयात ब्यूगु लछिया अल्टिमेटम क्वचाये छन्हू न्ह्य: मंगलवाः प्रधानमन्त्रीयात नापलाना उद्योग व्यवसायीतय्सं थःपिनिगु लछिया अल्टिमेटमया दुने देय्या शान्ति सुरक्षाया अवस्थाय् छुं सुधार जूसां नं आशा अनुरुप सुधार मजूगु, ऊर्जा संकटया कारण उद्योगधन्दा धराशायी जूगु व उद्योगमैत्री नीति व ज्याझ्वः वयेमफुगु गुनासो प्वंकूगु खः ।
लुमंकेबहजू, लछि न्ह्यः नेपाल उद्योग वाणिज्य महासंघया अध्यक्ष कुशकुमार जोशीया नेतृत्वया प्रतिनिधिमण्डलं प्रधानमन्त्री नेपालयात नापलानाः शान्ति सुरक्षा सुनिश्ति मजूसाः थःथःगु उद्योगधन्दा बन्द यानाः ताःचा सरकारयात लःल्हायेगु ख्याच्वः ब्यूगु खः ।
