थौं ल्हुति पुन्हि अर्थात हनुमान जयन्ती

दछिया छक्वः वइगु थीथी पुन्हि मध्ये थौंया ल्हुति पुन्हि नं छगू खः। येँ देय्या पश्चिम कुनय् लाःगु छगू धार्मिक लागा खः ल्हुति। थुकियात बालाजु नं धाः। भुइजःसिइ बुढानिलकण्ठ नारायण दु थें थन बालकण्ठ नारायण दु। वहे नारायणया नामं 'बालाजु' धइगु नां च्वंगु खः। बालाजुइ नीनिधाः हिति दु। ल्हुति पुन्हि कुन्हु वहे नीनिधाः हितिइ मेला जुइ। ल्हुतिइ मेला जुइगु जुयाः थ्व पुन्हियात ल्हुति पुन्हि नं धायेगु याः।
उखे सक्वया गुँविहारय् च्वंम्ह म्हासुख्वाः माजुयात विहारं क्वत हयाः जात्रा न्ह्याकेगु ज्या नं थुबलय् जुइ। सक्वय् जात्रा जुइगु पुन्हि जुयाः थुकियात 'सक्व पुन्हि' नं धायेगु याः ।

अले थ्वहे न्हि कुन्हु हनुमानया नं जन्म जूगु खः। हनुमान बूगु न्हि जुयाः थौंया न्हियात 'हनुमान जयन्ती' कथं नं माने यायेगु याः। अष्ट चिरंजीवीपिं मध्ये छम्ह हनुमान नं लाः। चिरंजीवी धइगु ताःआयु दुम्ह खः। व्यास, मार्कण्डेय्, अस्वस्थामा, कृपाचार्य, बलि, परशुराम, विभिषण व हनुमान थुपिं प्यम्ह चिरंजीवी पुरुष खः ।

हनुमानया नं थीथी नां दु, गथे कि हनुमन्त, महावीर, बजरंग बलि, वायुपुत्र, पवन पुत्र, अञ्जनी पुत्र आदि। रामायणय् रामया सेवक जुयाः हनुमानं यक्व हे ज्या याःगु वर्णन यानातःगु दु। हनुमान छम्ह राम व सीताया तःधंम्ह भक्त खः।
पवन अर्थात फय्या काय जूगु कारणं हनुमान न्ह्याथाय् नं च्वय् थ्यंक ब्वयेफुम्ह प्राणी खः ।

स्वस्थानी बाखनय् धयातः कथं छगू पीठया उत्पत्तिखय् महाद्यःयाथाय् वनाः सेवा यानाः महाद्यःपाखें लंका भष्म याये फयेमा, रामया भक्त जुइ खने दयेमा धकाः आशिष कया वःम्ह खः हनुमान। थ्व हनुमानं नं थःगु ल्वाभः कथं विष्णु, यमराज, भिमसेन, दुर्योधनया थें गदा ज्वना जुइ ।

थीथी राममन्दिरया पिनेसं हनुमानया मूर्ति नं तयातःगु दइ। दुगःया चुलिंचू छपा तुतिं पुलिं चुयाः व छपा तुतिं पालिं चुयाः रामयात ज्वजलपा यानाच्वंम्ह हनुमानया मूर्ति दइसा थौंया न्हि वहे मूर्तियात भक्तजनतय्सं पुजा यानाच्वंगु दइ।
हनुमानया चःति गोही (मकर) या म्हुतुइ लानाः गर्भ दुगु व वहे गोहीया कोखं जन्म जूम्ह हनुमानया काय खः मकरध्वज। मकरध्वज नं हनुमान ति हे बल्लाःम्ह वीर पुरुष खः ।

-लव कर्माचार्य