न्हिं ४०,००० यात तिंख्यलय् योग !
येँ (सन्ध्या टाइम्स)/नेपाःया राजनीतिक नेतात मेमेगु राष्ट्रिय मुद्दाय् छप्पँ मजूसां भारतं झाःम्ह बाबा रामदेवलिसे योग यायेगु सवालय् धाःसा छप्पँ हे दुगु जुयाच्वन। शुरुइ राष्ट्रपति डा. रामवरण यादवं उलेज्या यानादीगु योगय् उकुन्हु एमालेया अध्यक्ष झलनाथ खनालं ब्वति कयादीगु खःसा म्हिगः माओवादी अध्यक्ष प्रचण्डं ब्वति कयादिल। प्रचण्ड थः कायलिसे तुं तिंख्यलय् योग याः झाःगु खः। रामदेवं वय्कःयात नं छम्ह सा दान यानादीगु दु। म्हिगः तिंख्यलय् योग शिविर उलेज्या यासें भाजु प्रचण्डं राजनीतिक भाषण यानादीत्यंबलय् धाःसा साधकतय्सं हुटिङ्ग यानाः वय्कःया राजनीतिक खँ न्ववाके मबिउगु खः ।
थौंकन्हय् तिंख्यलय् सुथय् सुथय् न्हिं ४०,००० मनुखं योग याः वयाच्वंगु खँ ग्वसाः खलकं धाःगु दु। उकी ब्वति कायेत २१००/-, ११००/- व ५००/- तकाया टिकट कायेमाः। खुन्हु तक जुइगु थ्व शिविरय् ब्वति कायेत देय्या ७५ जिल्ला बाहेक भारतं तकं द्वःछिम्ह मनूत सहभागी जुयाच्वंगु खँ ग्वसाः खलःया भाजु प्रेम शोनीं कनादिल ।
तिंख्यलय् बाहेक म्हिगः न्हिनय् मस्तय्गु निंतिं जक छगू बिस्कं शिविर नं तःगु खः। उगु शिविरय् १५,००० म्ह मस्तय्सं ब्वति काःगु खः। योग शिविरय् वयाः थःपिंत थीथी कथंया स्वास्थ्य समस्यां मुक्ति प्राप्त जूगु खँ उकी ब्वति काःपिं सहभागीतय्सं धाःगु दु ।
नेपालय् नेतातय्त नं योग याकादीम्ह रामदेवं आः भारतय् थम्हं नं योगीतय् पार्टी चायेकेगु घोषणा याःगु दुसा वय्कःयात अज्याःगु पार्टी चायेके मते धकाः हिन्दूवादी पार्टी भाजपां इनाप यानाच्वंगु दु ।
