मिसा हायेकीपिं प्रहरीत
येँ (सन्ध्या टाइम्स)/मिसा हायेकूगु द्वपनय् सुर्खेतया न्याम्ह प्रहरीयात स्थानीय जनतां दाये फक्व दायाः ध्यबा समेत बं पुइकूगु दु। स्थानीय बाबियाचौरय् च्वंम्ह भक्तबहादुर बलामिया म्ह्याय्यात हायेकूगु द्वपनय् जनतां उमित दायाः न्यासः दां बं पुइका छ्वःगु खः ।
इलाका प्रहरी कार्यालयया असई मानबहादुर गुरुङ, सई बलबहादुर महतारा व मेपिं निम्ह प्रहरी जवानतय्सं अय्लाः त्वनाः मिसायात हायेकूगु जुयाच्वन। थः म्ह्याय्यात छाय् हायेकागु धकाः मिसाया अबुं पंबलय् असई गुरुङं अबुम्हेसित हे ल्हाः वायेवं आक्रोशित जूपिं स्थानीय मनूतय्सं न्याम्हं प्रहरीयात दाये फक्व दायाः माफी फ्वंकुसें न्यासः दां बं पुइकूगु खः ।
घटनाया बारे स्थानीय लागाय् तसकं चर्चा जुयाच्वंगु दु। तर सुर्खेतया जिल्ला प्रहरी कार्यालयया प्रमुख गणेश थापां धाःसा प्रहरीतय्सं मिसा हायेकूगु मखुसां उमित स्थानीय जनतां ल्हाः वाःगु धकाः द्वपं बिउगु दु ।
