डा. मानन्धरयात धर्मोदयया भिंतुना
येँ (सन्ध्या टाइम्स)/लुम्बिनी बौद्ध विश्वविद्यालय २०६१ सालय् गठन जुसांनिसें आः तक बैठक छगू हे च्वने मफयाच्वंगु खःसा आः न्हू नियुक्त जुयादीम्ह उपकुलपति डा. त्रिरत्न मानन्धरं लछिया दुने हे न्हापांगु बैठक सःताः ज्या न्ह्याकेगु बचं बियादीगु दु। धर्मोदय सभापाखें वय्कःया हनाय् याःगु ज्याझ्वलय् न्ववासें वय्कलं थ्व बचं बियादीगु खः ।
ज्याझ्वलय् न्ववासें वय्कलं थुगु विश्वविद्यालय बुद्ध धर्मया धरोहर जूगुलिं परम्परागत शिक्षा (मोनास्टिक एजुकेशन) यात मू अंग दयेकाः न्ह्याकेगु व बुद्ध धर्मया स्वंगुलिं सम्प्रदाययात समानान्तर रुपं विकास यानाः ई कथं परिमार्जन याना यंकेगु खँ नं कनादिल ।
थौंकन्हय् भगवान बुद्धया विष्णुया गुंगूगु अवतार धकाः गुगु धायेगु यानाच्वंगु खः थ्व बुद्ध जन्म जुयाः द्वःछि ति दँ लिपांनिसें तिनि गुप्त कालय् तत्कालिन हिन्दूतय्सं धायेगु शुरु याना हःगु खः धकाः नं वय्कलं कनादिल।
धर्मोदय सभाया नायः बद्रीरत्न वज्राचार्यया सभापतित्वय् जूगु उगु ज्याझ्वलय् सभाया महासचिव सुचित्रमान शाक्यं लसकुस यानादीगु खः ।
ज्याझ्वलय् भिक्षु ज्ञानपुर्णिक महास्थविर, लोकदर्शन वज्राचार्य, लक्ष्मीदास मानन्धरपिंसं नं लुम्बिनी बौद्ध विश्वविद्यालयया सञ्चालन याकनं हे यायेमाःगु व उकिया निंतिं बुद्धिजीवीपिंलिसे नं सल्लाह याना वनेमाःगु बिचाः प्वंकादीगु खः ।
