धितोपत्र बोर्डया विवाद कायम
वार्ता यायेगु खःसा तालं चायेकि: अध्यक्ष
येँ (सन्ध्या टाइम्स)/शेयर बजाःया नियमाकारी निकाय नेपाल धितोपत्र बोर्डयय् जुयाच्वंगु विवाद अझं नं कायम हे जुयाच्वंगु दु ।
धितोपत्र बोर्डया अध्यक्ष शूरवीर पौडेलं अनावश्यक रुपं कर्मचारीत भर्ना याःगु व आवश्यक हे मजूगु नापं दरबन्दी तकं मदुगु थासय् नं कर्मचारी नियुक्ति याःगु धासें धितोपत्र बोर्ड कर्मचारी यूनियनं वंगु चैत्र ४ गते निसें अध्यक्षया ज्याकुथिइ तालं ग्वया बिउगु खः। अध्यक्षया कार्यकक्षय् तालं ग्वया बिउगु कारणं शेयर बजाः सम्बन्धि नीतिगत खँय् छुं नं निर्णय जुइ फयाच्वंगु मदु ।
बोर्डया अध्यक्षया गलत क्रियाकलापया कारणं थःपिं आन्दोलनय् कुहां वयेत बाध्य जूगु कर्मचारी यूनियनया छम्ह पदाधिकारीं धाःगु दु ।
शेयर बजाःया नियमनकारी निकाय, अर्थ मन्त्रालय व नेपाल धितोपत्र बोर्डया दथुइ जुइमाःगु समन्वयया बारे सहलह ब्याकेत धितोपत्र बोर्डया विभागीय प्रमुखत नापं सहलह जूसां बोर्ड अध्यक्ष मवःगुलिं छुं नं खँय् सहमति मजूगु नं उम्ह पदाधिकारीं जानकारी बिउगु दु। तर नं उम्ह पदाधिकारीं वार्ताया माध्यमं सहमतिया लँपु माले फइगु खँ धाःगु दु।
उखे बोर्डया अध्यक्ष पौडेलं धाःसा कर्मचारीतसें ययःथे याःगु द्वपं खँ धाःगु दु। थःपिनिगु माग छु दु धइगु तकं नं जानकारी मबिसे कर्मचारीतय्सं तालं ग्वया बिउगु व यदि वार्ता यायेगु खःसा तालं चायेकेमाःगु अध्यक्षं धाःगु दु ।
बोर्डया विवादया कारणं शेयर बजाः प्रभावित जुजु वनाच्वंगुलिं याकनं स्वयां याकनं विवाद ज्यंकेत इनाप याःगु दु ।
