सरकार अझ बल्लाना वंगु संचारमन्त्रीया दावी
सूचना व संचारमन्त्री शंकर पोखरेलं माओवादीं वर्तमान सरकार क्वथलेगु गुलि योजना दयेकी थ्व सरकार उली हे बल्लाना वनाच्वंगु दावी यानादीगु दु ।
सोमवाः प्रेस चौतारीं पोखराय् ग्वसाःग्वःगु पत्रकार नापलायेगु ज्याझ्वलय् वय्कलं वर्तमान सरकार माओवादीया कारण कमजोर मखसें बल्लाना वनाच्वंगुलिं धयादिल । वय्कलं माओवादीयात प्रक्रिया पूवंकाः व कानुनसम्मत तरिकां संसदय् थःगु पक्षय् बहुमत हयाः सरकार गठन यायेत हाथ्या बियादिल ।
वय्कलं माओवादी नेतृत्वया सरकारं याकचा न्ह्यावनेत स्वःगुलिं संविधानसभा दुनेया नीनिगू दलया समर्थनं वर्तमान सरकार गठन जूगु धयादिसें माओवादीयात थःगु हठ त्वःताः सहमति व सहकार्य यानाः न्ह्याः वनेत इनाप यानादिल ।
अथेहे मन्त्री पोखरेलं दच्छि न्ह्यःया तुलनाय् देय्या शान्ति सुरक्षाया अवस्था सुदृढ जूगु दावी यानादिसें वर्तमान सरकारं शान्ति प्रकृयायात तिर्कक निष्कर्षय् थ्यंकाः इलय् संविधान निर्माण याइगु दावी यानादिल ।
