प्रधानमन्त्रीपाखें परामर्श जारी
प्रधानमन्त्री माधवकुमार नेपालं छुं न्हि न्ह्यः निसें न्ह्याकादीगु परामर्श सोमवाः नं जारी जूगु दु । वय्कलं समसामयिक विषयया सम्बन्धय् संविधानसभाय् प्रतिनिधित्व दुगु दलनाप परामर्श यानादीगु खः । वय्कलं शान्ति प्रकृया, न्हूगु संविधान, लडाकु समायोजन लगायतया विषयलय् दलतनाप सहलह यानादीगु खः ।
प्रधानमन्त्री व मन्त्रिपरिषद्या ज्याकू सिंहदरवारय् सोमवा: प्रम नेपालं राष्ट्रिय जनमोर्चाया अध्यक्ष चित्रबहादुर केसी, नेमकिपाया अध्यक्ष नारायणमान विजुक्छे, चुरेभावर राष्ट्रिय एकता पार्टीया अध्यक्ष केशवप्रसाद मैनाली, समाजवादी प्रजातान्त्रिक जनता पार्टीया अध्यक्ष प्रेमबहादुर सिंह, नेपाल लोकतान्त्रिक समाजवादी दलया लक्ष्मीलाल चौधरी व संघीय लोकतान्त्रिक राष्ट्रिय मंचया खगेन्द्र माखिम नाप बिस्कं बिस्कं परामर्श यानादीगु खः ।
खँल्हाबंलाय् थीथी दलया नेतातय्सं बहुमत हयाः वैधानिक ढंगं न्हायगू नं दलं सरकार गठन यायेफइगु, पूर्वाग्रही मजुसें मापदण्ड पूवंकूपिं न्ह्याम्ह नं नेपाली नागरिकयात सेनाय् समायोजन यायेफइगु, इलय् हे संविधान निर्माण यायेत गम्भीर जुइमाःगु लगायत सुझावत प्रधानमन्त्रीयात ब्यूगु खः ।
