भट्टराईया अभिव्यक्ति प्रति खनालया आपत्ति
नेकपा (एमाले)या अध्यक्ष झलनाथ खनालं पुलांम्ह प्रधानमन्त्री कृष्णप्रसाद भट्टराईया अभिव्यक्ति प्रति आपत्ति प्वंकादीगु दु । वय्कलं भट्टराईया अभिव्यक्तियात दक्षिणपन्थी, पुनुरुत्थानवादीया चलखेल जूगु धयादिल ।
सिंहदरवराय् सोमवाः पत्रकारत नाप खँल्हाबंला यानादिसें खनालं भट्टराईया थंज्याःगु अभिव्यक्ति बीपिं थः हे परास्त जुयावनीगु धयादिल । वय्कलं दक्षिणपन्थीतय्सं चलखेल शुरु याःगु धयादिसें थुकीयात बांलाक थुइकाः संविधान निर्माणया निंतिं प्रमुख दलत छप्पँ जुइमाःगु धयादिल ।
पुलांम्ह प्रधानमन्त्री भट्टराईं आइतवाः बहनी छगू विज्ञप्ति पिथनादिसें आः न्हूगु संविधान निर्माण जुइगु अवस्था मदुगु धयादिसें २०४७ सालया हे संविधान लागु यायेमाः खँ न्ह्यथंनादीगु खः । नापं वय्कलं गणतन्त्र, धर्म निरपेक्षता व संघीयता हथाय्सं घोषणा यानाः देय्या पहिचान तंकूगु खँ धयादीगु खः ।
