न्हूगु सरकार गठन बारे माओवादी व फोरम दथुइ सहलह
एमाले नाप नं सहलह
वर्तमान सरकार असफल जूगुलिं न्हूगु सरकार गठन यायेमाःगु धासें एकीकृत नेकपा (माओवादीं) मधेशी जनअधिकार फोरम नाप सहलह याःगु दु । माओवादी संसदीय दलया ज्याकू सिंहदरवारय् जूगु खँल्हाबंलाय् वर्तमान सरकारं शान्ति प्रकृया व संविधान निर्माण यायेमफइगुलिं न्हूगु राष्ट्रिय सहमतिया सरकार गठन यायेगु बारे सहलह जूगु खः ।
बैठक लिपाः संचारकर्मीत नाप खँल्हाबंला यानादिसें फोरमया सहअध्यक्ष जयप्रकाश प्रसाद गुप्तां थ्व सरकार असफल जुइधुंकूगुलिं थौं नं निसें हे वर्तमान सरकाराया विरोधय् फारेमं प्रदर्शन यायेगु कनादिल । वय्कलं थनिनिसें हे फोरमं प्रधानमन्त्री व मन्त्रीतय्त हाकूगु ध्वाँय् क्यनीगु ज्याझ्वः दुगु कनादिल ।
बैठकय् माओवादी अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष मोहन वैद्य 'किरण', महासचिव रामबहादुर थापा 'बादल' व फोरमया पाखें अध्यक्ष उपेन्द्र यादव व सहअध्यक्ष गुप्ताया उपस्थिति दुगु खः ।
अथेहे फोरम नापया खँल्हाबंला लिपाः माओवादीं सत्तारुढ नेकपा (एमाले) नाप नं सहलह याःगु दु । माओवादीं एमाले नाप राष्ट्रिय सहमतिया सरकार लगायतया बारे सहलह याःगु खः । अथेहे वाईसिएलया अर्ध सैनिक संरचना विघटन यायेगु, लडाकु समायोजन लगायतया विषयलय् नं खँल्हाबंला जूगु खः ।
खँल्हाबंला लिपाः एमाले अध्यक्ष झलनाथ खनालं शान्ति व संविधानया निंतिं राष्ट्रिय सहमति यानाः न्ह्याः वनेत न्ह्यागू लँपु ल्येत नं एमाले तयार जूगु कनादिल ।
