हत्याया विरोधय् माओवादी पाखें देय्न्यंकया उद्योग बन्द

एकीकृत नेकपा (माओवादी) सम्बद्ध ट्रेड युनियन महासंघया केन्द्रीय दुजः नापं मिथिला राज्य समितिया संयोजक राम अयोधी यादवयात गोलीं क्येकाः स्याःगु विरोधय् युनियनं सोमवा: देय्न्यंकया उद्योग कलकारखाना बन्द याःगु दु । बन्दया कारण देय्न्यकंया उद्योग कलकारखाना ठप्प जूगु दु । स्वनिगः नापं देय्या थीथी थासय् थुकीया प्रभाव लाःगु दु ।

थ्वहे झ्वलय् बन्दयय् उद्योग संचालन याःगु धासें माओवादी कार्यकर्तातय्सं सुनसरीया इटहरीलय् टासी इन्डस्ट्रिज प्रालिइ तोडफोड याःगु दु । उगु इलय् प्रदर्शनकारी व कर्मचारीत दथुइ ल्वापू जुयाः खुम्ह कर्मचारीत घाःपाः जूगु दु । तोडफोडय् छगू लख च्यय्द्वं बराबरया धनमाल क्षति जूगु खँ धाःगु दु ।

हत्याया विरोधय् न्हिनय् झिंनिताः इलं निसें निताः ई तक चक्काजाम याइगु ज्याझ्वः नं दु ।