देशय् शान्ति सुरक्षाया अवस्थाय् सुधार : प्रम
प्रधानमन्त्री माधवकुमार नेपालं देशय् शान्ति सुरक्षाया अवस्था सुधार जूगु दावी यानादीगु दु ।
आइतवाः येँय् चेम्बर अफ कमर्सया साधारण सभाया उल्लेज्या यानादिसें प्रधानमन्त्री नेपालं उद्योग व्यवसायीतय्सं शान्ति सुरक्षा प्रति क्यंगू च्यूताः प्रति सरकार गम्भीर जूगु धयादिसें देय्या शान्ति सुरक्षाया अवस्था न्हापा स्वयां बालांगु धयादिल । वय्कलं बन्द हड्ताल थंज्याःगु ज्या मयायेगु प्रतिबद्धता प्वंकूपिं राजनीतिक दलतय्सं हे थुकीयात प्रोत्साहन बियाच्वंगु द्वपं बियादिल ।
अथेहे वय्कलं उद्योग व्यवसायीया सुरक्षायात विषेश प्राथमिकता बियाः सरकारं याकनं हे सशस्त्र प्रहरी बलया थप जनशक्ति मध्ये छुंछुंयात औद्योगिक सुरक्षा निर्माण यायेगु तयारी सरकारं यानाच्वंगु धयादिल ।
ज्याझ्वलय् वय्कलं पुलांम्ह प्रधानमन्त्री गिरिजाप्रसाद कोइरालां माओवादीया स्वद्वं जक लडाकु सुरक्षा निकायलय् समायोजन यायेफइगु खँ धाःगु दावी यानादिल । वय्कलं कोइराला देय्या अभिभावक जूगु धयादिसें वय्कया उत्तराधिकारी धकाः धयाः जूपिं माओवादीं वय्कया म्हगस पूवंकेत गुली गम्भीर जुइ धइगु बारे आः थःम्हं स्वयेगु धयादिल ।
