कोइराला नं माओवादी सहितया राष्ट्रिय सरकारया पक्षय् : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं पुलांम्ह प्रधानमन्त्री गिरिजाप्रसाद कोइराला नं वर्तमान सरकारया थासय् माओवादी सहितया न्हूगु राष्ट्रिय सहमतिया सरकारया पक्षय् दुगु खँ धयादीगु दु ।
क्रान्तिकारी पत्रकार संघ तमुवान समितिं पोखराय् आइतवाः ग्वसाःग्वःगु पत्रकार सम्मेलनय् वय्कलं कोइराला नं वर्तमान सरकार चीकेमाःगु पक्षय् दुगु व प्रधानमन्त्री माधवकुमार नेपाल नं प्रधानमन्त्रीया पदं राजीनामा बी चाहे जूगु दावी यानादिल । वय्कलं उच्चस्तरीय राजनीतिक संयन्त्रय् कोइरालां थ्व सरकार चीकेगु बारे खँ तःगु व उकीया साक्षी एमाले अध्यक्ष झलनाथ खनाल जूगु धयादिल ।
पत्रकार सम्मेलनय् वय्कलं न्हापा राज्य पुनःसंरचना आयोग दयेकीगु पहल माओवादीं हे याःगु तर आ: संविधान निर्माण यायेत यक्वः ई मदुगुलिं उकीया गठन उली सान्दर्भिक मजूगु धयादिल । नापं वय्कलं आवश्यक जुसाः आयेग गठन यायेफइगु तर उकीयात प्रविधिक ज्या यायेगु कथं गठन यायेफइगु धयादिल ।
अथेहे वय्कलं माओवादी जातीयताया आधारय् मखसें राष्ट्रियताया आधारय् संघीय संरचना निर्माण यायेगु पक्षय् दुगु धयादिसें भाषा, संस्कृति आदि उत्पीडनय् मलागू क्षेत्री, ब्रम्हू समाजया सक्रियतां जातीय दंगा हयेफइगु धयादिल ।
