जनबाहाःद्यःया जात्रा तःजिक क्वचाल

येँ (सन्ध्या टाइम्स)/थुगु दँया जनबाहाःद्यःया जात्रा म्हिगः क्वचाल। म्हिगः लगमं द्यः हयाः जनबाहालय् थ्यंकूसां द्यःयात देगलय् धाःसा तःगु मदुनि। थौं विशेष पुजा यानाःलि तिनि द्यःयात देगलय् तइ ।

उखे जात्रा ग्वसाः खलःया संयोजक पूर्णरत्न वज्राचार्यं थुगुसी फुक्क हे त्वाःया क्लब व स्थानीय मनूतय् ग्वाहालिं यानाः न्हापा गबलें हे मजूनि कथं तःजिक जात्रा सम्पन्न जूगु खँ कनादीगु दु ।