जनजाति महासंघय् च्याम्ह उम्मेदवार
येँ (सन्ध्या टाइम्स)/आदिवासी जनजाति महासंघया नायः पदया निंतिं थुगुसी जुइगु चुनावय् च्याम्ह जनजाति नेतातय्सं धेंधेंबल्लाः यायेत्यंगु दु। महासंघया महाधिवेशन न्ह्यः म्हिगःनिसें येँय् न्ह्याःगु जनजाति महासंघया संघीय परिषदया मुँज्याय् च्याम्ह जनजाति नेतातय्सं थःपिनि उम्मेदवारी घोषणा याःगु खः ।
वइगु चैत्र २१ निसें २३ गते तक येँय् महासंघया न्हय्क्वःगु महाधिवेशन जुइत्यंगु दु। उकी महासंघया न्हूगु नेतृत्व ल्ययेगु ज्या नं जुइ ।
आः तक थःपिनि उम्मेदवारी घोषणा यानादीपिं नेवाः देय् दबूया नायः नरेश ताम्राकार, थारूपाखें राजकुमार लेखी, विजय दनुवार, नोबु घले लगायतया नां न्ह्यःने वयाच्वंगु दु। वय्कःपिंसं थःपिनि प्रभाव क्षेत्रय् प्रचार अभियान नापं न्ह्याकेधुंकूगु दु। थौंकन्हय् महासंघया नायः सभासद् पासाङ शेर्पा खः ।
म्हिगःनिसें न्ह्याःगु परिषदया मुँज्याय् महासंघया मूछ्याञ्जें न्ह्यब्वःगु प्रतिवेदन म्हिगः हे पारित याःगु दु। उगु प्रतिवेदनय् भारतया नेतातय्सं नेपाःयात हिन्दू राष्ट्र घोषणा यायेमाः धकाः नेपालय् हे वयाः न्ववानाच्वंगु खँयात कडा रुपं विरोध याःगु दु। अथे हे थौं उगु परिषदया मुँज्याय् दांभरिया प्रतिवेदनयात कयाः सहलह जुयाच्वंगु दु। मुँज्याय् फुक्क आदिवासी जनजातिपाखें छम्ह मिजं व छम्ह मिसा यानाः निम्ह निम्ह प्रतिनिधितय्सं ब्वति कयाच्वंगु दु ।
