माओवादीया बाँके ज्याकुथी बम मुल
येँ (सन्ध्या टाइम्स)/प्रमुख प्रतिपक्षी दल एकिकृत नेकपा (माओवादी)या बाँके ज्याकुथी थौं सुथय् बम मूगु दु ।
बाँकेया कोरियनपुरया वडा नं. १६ लागाय् च्वंगु माओवादीया ज्याकुथी अथे बम बिस्फोट जूगु खः। थौं सुथय् ५ बजेपाखे छथ्वः म्हमसिउपिं मनूत वयाः ज्याकुथी सुं मदुगु पाः लाकाः बम मुइका थकूगु खँ धाःगु दु ।
सुथ न्हापां हे बम विस्फोट जूगुलिं छुं नं कथंया मानवीय क्षति धाःसा मजू। माओवादी ज्याकुथी प्रेसर कुकर बम बिस्फोट जूगु खँ बाँकेया प्रहरीं धाःगु दु। बम विस्फोट जूगुलिं ज्याकुथी च्वंगु अप्वः सामान क्षति जूगु दुसा ज्याकू दुगु भवन नं चर्के जूगु दु। ज्याकूया झ्याःया न्हाय्कं तज्याःगु दुसा लुखा नं स्यंगु दु ।
उगु बम विस्फोटया घटनायात कयाः प्रहरीं अनुसन्धान यानाच्वंगु दुसां थौं सुथय् १० बजे तक सुयातं ज्वंगु धाःसा मदुनि ।
माओवादी ज्याकुथी बम मुइकूगु थ्व घटनायात अन भूमिगत रुपं सशस्त्र आन्दोलन याना वयाच्वंगु ज्वालासिंह पुचलं जिम्मा काःगु दु ।
उगु पुचःया बाँकेया इन्चार्ज भरतसिंहं स्थानीय संचार माध्यमतय्त टेलिफोन यानाः बम थःपिंसं मुइका बियागु खः धकाः जिम्मेवारी काःगु खः। माओवादीया ज्याकुथिइ अथे छाय् बम मुइकूगु खः धइगु खँ धाःसा सीके फुगु मदुनि ।
