जैविक फोहोरपाखें संस्थागत रुपं बायोग्यास निर्माण
यल (सन्ध्या टाइम्स)/थनया उपमहानगरपालिका लागाय् अप्वया वनाच्वंगु फोहोरया समस्या न्हंकेगु ल्याखं देय्या थीथी झिंनिगू नगरपालिकाय् जैविक फोहोरपाखें संस्थागत रुपं बहुउद्देश्यीय बायोग्यास प्लान्ट निर्माण याइगु जूगु दु।
राष्ट्र संघीय विकास कार्यक्रम, साना अनुदान कार्यक्रम, विश्व वातावरण कोषया ग्वाहालिइ नेपाल सौर्य उर्जा समाज व यल उप महानगरपालिकाया मंकाः कुतलय् गुगु बायोग्यास प्लान्टया निर्माण यायेत्यंगु खः ।
बायोग्यास उत्पादन याइपिं उद्यमीतय् निंतिं ग्वसाः ग्वःगु स्वन्हुयंकंया जनचेतनामूलक तालिमया लिपांगु न्हिया ज्याझ्वलय् सभासद कविन्द्रनाथ ठाकुरं जैविक फोहोर वस्तुया लिधंसाय् संसथागत रुपं बायोग्यास प्लान्टया निर्माणं वातावरणय् वयाच्वंगु उत्सर्जन क्वपालेत तिबः जुइगु नापं फोहोर व्यवस्थापन जुइगु जक मखसे वातावरण स्वच्छ जुइगु नं विश्वास प्वंकादिल ।
उगु ज्याझ्वलय् समाजया नायः प्रा जगन्नाथ श्रेष्ठं शहरी क्षेत्रया तःधंगु समस्याया रुपय् दयाच्वंगु फोहोरया उचित व्यवस्थापन यानाः उर्जा संकतय् म्होति हयेत नं थुगु प्रविधियात दक्वं शहरी क्षेत्रय् विस्तार याना यंकेमाःगु आवश्यकतायात कुलादिल ।
साना अनुदानया प्रतिनिधि विवेक शर्मां फोहोरपाखें नं विदेशी मुद्रा आर्जनया लिसें शहरया वातावरण स्वच्छ व सफा यायेगु नापं जैविक फोहारया लिधंसाय् बायोग्यास प्लान्टया निर्माण यायेगु ज्यायात मेमेगु नगरपालिकां नं निरन्तरता बीमाःगु खँय् जोड बियादीगु दु ।
