माओवादी व कांग्रेस दथुइ सहलह
सत्तारुढ नेपाली कांग्रेस व प्रमुख विपक्षी दल एनेकपा (माओवादी) दथुइ राजनीतिक गतिरोध चीकेगु लगायत संविधान निर्माणया बारे सहलह जूगु दु । शनिवाः येँया छगू होटलय् माओवादी अध्यक्ष पुष्पकमल दाहाल 'प्रचण्ड' लगायत नेतात नाप कांग्रेसया उपसभापति रामचन्द्र पौडेल लगायत नेतात दथुइ खँल्हाबंला जूगु खः ।
खँल्हाबंलाय् राजनीतिक गतिरोध चीकाः न्ह्याः वनेगु वाईसीएलया अर्धसैनिक संरचना विघटन यायेगु नापं इलय् हे संविधान निर्माण यायेगु विषयलय् खँल्हाबंला जूगु खः । खँल्हाबंलाय् संविधान निर्माणया विषयगत समितिं मस्यौदा तयार यायेत थाकुयाच्वंगु विषय लगायत दक्वं संविधानया मुद्दायात सहलह यानाः क्वचायेकीगु बारे सहलह जूगु खः ।
खँल्हाबंला लिपाः माओवादी अध्यक्ष प्रचण्डं कांग्रेस नापया खँल्हाबंला तसकं सकारात्मक जूगु धयादिसें थ्व सुरुवात जूगु व आः सहलह निरन्तर न्ह्याः वनीगु धयादिल । वय्कलं थौंया बैठकं दक्वं सन्तुष्ट जूगु निष्कर्ष पिहांवःगु कनादिल ।
अथेहे कांग्रेस उपसभापति पौडेलं सहमतिया निंतिं माओवादी पाखें सकारात्मक लक्षण खनेदुगु धयादिसें थौंया खँल्हाबंला पाखें सहलह यानाः सहमतिलय् वनेफइगु संकेत खनेदुगु धयादिल । नापं वय्कलं माओवादी वाईसीएलया अर्धसैनिक संरचना अन्त्य यायेगु बारे नं सकारात्मक जूगु कनादिल ।
