'माओवादी नेतृत्वया सरकार बिना संविधान निर्माण मजुइगु'
एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' थःगु पार्टीया नेतृत्वय् राष्ट्रिय सहमतिया सरकार निर्माण मजुतल्ले शान्ति प्रकृया व संविधान निर्माण प्रकृया सफल मजुइगु दावी यानादीगु दु । अथेहे वय्कलं सेना समायोजन व संविधान निर्माण यायेगु ज्या नापनापं यायेमाःगु धयादिल ।
कौलालीया गेटा विमानस्थलय् शनिवाः पत्रकारत नाप खँल्हाबंला यानादिसें वय्कलं पुलांम्ह जुजु ज्ञानेन्द्र शाहं राजतन्त्र अन्त्य मजुनी धकाः धाःगु अभिव्यक्तिं नेपाली जनतायात अपमान याःगु धयादिसें उगु अभिव्यक्ति नेपालीया निंतिं तःधंगु हाथ्या जूगु धयादिल । नापं वय्कलं अज्याःगु अभिव्यक्ति बीम्ह ज्ञानेन्द्रया सुविधा कटौती यायेमाःगु व नागार्जुन दरवारं नं लिकायेमाःगु बिचाः प्वंकादिल ।
अथेहे नेता प्रकाशं माओवादी शान्ति प्रकृया सफल यायेगु व संविधान निर्माण यायेगु पक्षय् दुगु खँ न्ह्यथंनादिसें थुकीया निंतिं दक्वं राजनीतिक दलत दथुइ सहमति आवश्यक जूगु धयादिल । वय्कलं जेठ १४ गते दुने न्हूगु संविधान जारी मजूसाः माओवादीं जनविद्रोह यायेगु ख्याच्वः बियादिल ।
