ज्ञानेन्द्रया अभिव्यक्ति दलतय् कारणं वःगु पोखरेलया द्वपं
नेकपा (एमाले)या महासचिव ईश्वर पोखरेलं पुलांम्ह जुजु ज्ञानेन्द्र शहाया अभिव्यक्ति दलतय् हे कारणं वःगु द्वपं बियादीगु दु । वय्कलं उगु अभिव्यक्ति आपत्तिजनक जूगु धयादिसें थ्व अभिव्यक्ति वःगु मुख्य जिम्मेवार दलतय् अकर्मण्यता जूगु धयादिल । पोखरेलं पुलांम्ह जुजुया अभिव्यक्ति स्वयां दलतय आपसी सहमतिया निर्णय तःधंगुलिं दलत दथुइ हे आपसी सहमति यानाः खँ मिले यायेमाःगु धयादिल ।
प्रेस चौतारी दोलखां शनिवाः चरिकोटय् याःगु पत्रकार नापलायेगु ज्याझ्वलय् वय्कलं माओवादी लडाकुया समायोजन व व्यवस्थापन लिपाः जक संविधान निर्माण सम्भव जुइगुलिं दलतय् आपसी सहमतिया आधारय् सेना समायोजन व व्यवस्थापनया ज्यायात न्ह्यने न्ह्याकेमाःगु धयादिल ।
वय्कलं माओवादीं हिंसाया राजनीति त्वःता सहमति कायम याःगु खण्डय् गुलि ल्याख्य माओवादी लडाकु समायोजन यायेगु धइगु खँ तःधंगु मजुगु धयादिल । वयकलं धयादिल, 'माओवादी राजनीतक सहमतिलय् वःसा प्यद्वं वा झिद्वं लडाकु समायोजन यायेगु तःधंगु खँ मखु ।
वयकलं सेना समायोजन, राज्य पुनःस्थापनाया विषय संविधानसभाया ६०१ सभासदतयसं जक निर्णय यायेफइगुलिं राजनीतिक सहमति याना: वनेमा:गु खँय् ब: बियादिल ।
