माओवादी नेताया हत्या लिपा: पूर्व-पश्चिम राजमार्ग बन्द

एकीकृत नेकपा (माओवादी)या जिल्लास्तीय नेता राम अयोधी यादवयात शनिवाः सुथय् स्याःगु विरोधय् माओवादीं पूर्व-पश्चिमय् लाःगु सिरहाया बन्दिपुर निसें माइल तकया सतकमार्ग बन्द याःगु दु । माओवादी कार्यकर्तातय्सं थुगु सतक खण्डय् लागू थीथी थासय् टायर च्याकाः विरोध प्रदर्शन यानाच्वंगु दु । सतक बन्दया कारणं पूर्व-पश्चिम राजमार्गय् यात्रुत प्रभावित जूगु दु ।

शनिवाः सुथय् माओवादीया मिथिला राज्य समितिया दुजः व माओवादी मजदुर संगठन अखिल नेपाल ट्रेड युनियन महासंघ क्रान्तिकारीया सिरहा जिल्ला अध्यक्षयात गोलीं क्येकाः स्याःगु खः । थुकीया जिम्मा तराईया सशस्त्र पुच: जनतान्त्रिक तराई मुक्ति मोर्चा (राजन मुक्ति पुचलं) काःगु दु ।