गिरिजां त्वःता थकूगु निगुलिं कुर्सीइ ल्वापु
येँ (सन्ध्या टाइम्स)/कांग्रेस नेता गिरिजाप्रसाद कोइराला मदयेवं देय्या निगू महत्वपूर्ण कुर्सी खाली जूगु दु। आः उगु कुर्सीइ सु च्वनेगु धकाः घमासान नं शुरु जूगु दु ।
नेपाली कांग्रेसया सभापति सु जुइगु धकाः अन दुने निगूगु पुस्ताया नेता धकाः चर्चाय् वःपिं शेरबहादुर देउवा, सुशील कोइराला व रामचन्द्र पौडेल दथुइ कचवं शुरु जुइधुंकूगु दु। कोइराला मदये धुनेवं आः पार्टीया प्रमुख व्यक्तित्व थःहे खः धकाः सुशील कोइरालां दावी याना हःगु दुसा गिरिजा मदयेवं नेता जुइगु पाः थःगु हे खः धकाः शेर बहादुर देउवां मेगु दावी याना हःगु दु। निम्हेसिया दथुइ ल्वापु याकाः अन्तिमय् पद चाहिं थम्हं कायेगु दाउ रामचन्द्र पौडेलं यानाच्वंगु दु ।
उखे कोइराला हे संयोजक जुयाः गठन याःगु उच्चस्तरीय राजनीतिक संयन्त्रया न्हूम्ह संयोजक सु जुइगु धकाः नं विवाद पिहां वःगु दु। खास यानाः कोइराला उगु संयन्त्रया संयोजक जूगु कारणं वय्कः मदयेधुंकाः संयोजक पद स्वतः कांग्रेसया मेपिं नेतातय्त वनेमाः धइगु तर्क कांग्रेसयागु दु। उखे माओवादीं थःपिं संसदया दकलय् तःधंगु दल जूगु कारणं उच्चस्तरीय समितिया संयोजक थःपिंत हे माः धकाः माग यानाच्वंगु दु ।
निम्हेसिया दथुइ जूगु ल्वापुया लबः कासें एमालें धाःसा आःयात संयेजक जुइत निम्हं हथाय् चायेमाःगु मदु धकाः आश्वासन बीगु ज्या यानाच्वंगु दु। एमालें संयन्त्रय् च्वनेगु लागिं आः थथें हथाय् चायेमते धकाः कांग्रेस व माओवादी निगुलिं पार्टीयात इनाप यानाच्वंगु दु। एमालेया सरकारं थ्व संयन्त्रयात खास हे महत्व बियाच्वंगु मदु ।
