रक्षा मन्त्री व सेनाया धापू फय्गं पुष्टी
बर्दिया हत्या काण्ड
येँ (सन्ध्या टाइम्स)/बर्दिया राष्ट्रिय निकुञ्ज दुने निवाः न्ह्यः छगू हे परिवारया स्वम्ह मिसायात गोलीं कयेकाः स्याःगु बारे नेपाली सेनां पित हःगु धापू गलत खः धासें उगु घटनाय् सेनाया हे दोष दुगु खँ एशियाली मानव अधिकार आयोगं धाःगु दु ।
सेनां सीपिं स्वम्हं मिस्त शिकारी जूगुलिं उमित गोलीं कयेकाः स्यानागु खः धाःसां अनुसन्धान याना वंबलय् जंगलय् सीपिनि हि किना मच्वंगु वसः नं लुया वःगुलिं उमित न्हापां नियन्त्रणय् कयाः लिपा गोलीं कयेकाः स्याःगु खनेदु धकाः आयोगया प्रतिवेदनय् धयातःगु दु। सीपिंसं वासः दयेकेत जंगलय् दइगु छताजि सिमाया ख्वला मुंकातःगु खनेदुगुलिं नं उपिं चोरी शिकारया लागिं अन दुने वःपिं मखु धइगु प्रस्ट जूगु खँ नं उकी धयातःगु दु। प्रत्यक्षदर्शीतय्सं फागुन ११ गते सेनां हि बाः वयाच्वंगु लाशयात सालाः जंगलं पिने हयाच्वंगु खनागु धकाः नं बयान बिउगु खः ।
उखे राष्ट्रिय महिला आयोगं नं जंगल दुने स्वम्ह निःशस्त्र मिस्तय्त गोलीं कयेकाः स्याःगु बारे स्वतन्त्र छानबिन जुइमाः धकाः माग याःगु दु। आयोगं थुकिया बारे सेनां पित हःगु धापू पत्याः याये बहः मजूगु खँ नं धाःगु दु ।
सीपिं मिस्तय्त सेनां शिकारी धाःगुलिं रक्षा मन्त्री विद्या भण्डारीं नं उमित शिकारी हे धकाः द्वपं बियादीगु खः ।
