मंत मृत्युया कवि
नेपालभाषाया नांजाःम्ह कवि श्यामसुन्दर सैंजु म्हिगः बहनी मंत । ७० दँ दुम्ह वय्कः ताः इ न्ह्यवंनिसं दमया ल्वचं कयाच्वंम्ह खः । थौं पशुपति आर्यघाटय् वय्कःया अन्तिम संस्कार जुल ।वय्कलं नेपालभाषां आपालं कविता च्वयादीगु दुसां सफूया रुपय् धाःसा आः तक पिहां वःगु मदुनि । वय्कलं च्वयादीगु मृत्युवोध सम्बन्धी कविता विशेष रुपं चर्चित जू । वय्कलं छन्दवद्ध कविता नं यक्वं च्वयादीगु दुसा लिपांगु इलय् वयाः वय्कलं आपालं हाइकु च्वयादीगु दु ।
वय्कः नेपालभाषाया न्हापांम्ह गद्य कवि पूर्ण वैद्यया समकालीन खः । वय्कःयात कयाः कवि वैद्यं धयादी, 'वय्कः कवितायात थुइके फुम्ह कवि खः ।' कवि सैंजु सरकारी न्हिपौ 'गोरखापत्र'या पुलांम्ह प्रधान सम्पादक नं खः ।
वय्कःया स्वम्ह काय व छम्ह म्ह्याय् दी । थौं पशुपतिइ वय्कःयात अन्तिम श्रद्धांजलि प्वंकेत नेपालभाषाया आपालं साहित्यकारपिं थ्यंगु खः ।
