संयन्त्रया बैठकय् शोक प्रस्ताव पारित
प्रमुख स्वंगू दल दुथ्याःगु उच्चस्तरीय राजनीतिक संयन्त्रया बैठकं संयन्त्रया संयोजक नापं पुलांम्ह प्रधानमन्त्री गिरिजाप्रसाद कोइरालाया निधनप्रति शोक प्रस्ताव पारित याःगु दु ।
कोइरालाया निधन लिपाः न्हापांगु पटक च्वंगु संयन्त्रया बैठकं मदुम्ह कोइराला प्रति शोक प्रस्ताव पारित यायेगु बाहेक मेगू छुं निर्णय यायेमफुत । सिंहदरवारय् दुगु माओवादीया संसदीया ज्याकूथीइ च्वंगु बैठकय् संयन्त्रयात गुकथं संचालन यायेगु बारे सहलह जुइगु धाःसां थुकीया बारे शुक्रवाःया बैठकय् छुं सहलह मजू ।
माओवादी व कांग्रेसं संयन्त्रया नेतृत्व थःथःगु दलयात दयेमाःगु अडान कायावयाच्वंगु दुःसा एमालें थुकीया नेतृत्व पालंपाः यायेमाःगु प्रस्ताव तयाच्वंगु दु । संयन्त्रया मेगू बैठकय् थुकीया बारे सहलह यानाः निर्णय याइगु खँ धाःगु दु । नापं मेगू बैठकय् संयन्त्रया क्रियाशिलता बारे नं निर्णय याइगु ज्याझ्वः दु ।
बैठक लिपाः कांग्रेस संसदीय दलया नेता रामचन्द पौडेलं थौंया बैठकय् संयन्त्रया संयोजकया बारे छुं नं सहलह मजुगु धयादिसें थुकीया बारे मेगू बैठकय् सहलह जुइगु धयादिल ।
