शिक्षण अस्पताल चायेकेत मन्त्रीयात इनाप
नेपाल चिकित्सक संघ त्रिवि शिक्षण अस्पतालया नियमित सेवा सुचारु यायेत स्पष्ट निर्देशन बीत शिक्षा मन्त्री सर्वेन्द्रनाथ शुक्लानाप इनाप याःगु दु । संघं शुक्रवाः छगू विज्ञप्ति पिथना स्नातकोत्तर तहया प्रवेश परीक्षया विषययात कयाः जूगु घटनाया सम्बन्धय् जुयाच्वंगु आन्दोलनया बारे अझं निकास पिहांमवःगु धासें मन्त्रीयात उकी पहल यायेत इनाप याःगु खः ।
संघं पिथंगु विज्ञप्तिइ चिकित्सा शास्त्र अध्ययन संस्थान थंज्याःगु गरिमामय व प्रतिष्ठित शैक्षिक संस्थाया गुणस्तरीयताया खँ स्मरणयोग्य जूगु खँ न्ह्यथंसें उगु समस्या समाधानया निंतिं दक्वं सम्बन्धित पुचः दुथ्याःगु निष्पक्ष सर्वमान्य उच्चस्तरीय छानबीन समिति गठन याःगु खँ धाःगु दु ।
उगु समितिया प्रतिवेदन मवतल्ले पदाधिकारीयात उपकूलपतिया ज्याकूथीइ हाजिर याकाः आन्दोलनकारी नाप वार्ता यानाः शिक्षण अस्पतालया नियमित सेवा सुचारु याकेत उपकूलपतियात लिखित जाकारी यानाःगु खँ संघं धाःगु दु ।
