श्रेष्ठया नां अनुमोदन
प्रधानन्यायाधिशया निंतिं सिफारिस जूम्ह सर्वोच्च अदालतया वरिष्ठ अधिवक्ता रामप्रसाद श्रेष्ठया नां संसदीय सुनुवाई विशेष समितिं सर्वसम्मतिं अनुमोदन याःगु दु । बिहीवाः च्वंगु समितिया बैठकं वय्कया नां सर्वसम्मतिं अनुमोदन याःगु खः । वय्कया विरुद्ध समितिलय् निगू उजुरी दर्ता जूगु खःसां निगूलिं उजुरीया प्रकृति श्रेष्ठ नाप सम्बन्धित मजूगुलिं समितिया बैठकय् थुकीया बारे सहलह मजु ।
बैठकय् प्रधानन्यायाधिश जुइधुंकाः लागू यायेगु थःगु कार्ययोजन न्ह्यब्वयादिसें श्रेष्ठं राजनीतिक मुद्दाया बिस्कं हे सूची दयेकाः याकनं निर्णय यायेगु धयादिल । वय्कलं न्यायपालिकाय् जुइगु ढिलासुस्तीयात व्यवस्थित यायेत व तत्काल दुरगामी प्रभाव लाइगु मुद्दायात थःगु प्राथमिकताय् तय्गु प्रतिबद्ध प्वंकादिल ।
वंगु चैत ४ गते च्वंगु संवैधानिक परिषद्या बैठकं सर्वोच्च अदालतया वरिष्ठताया आधारय् श्रेष्ठयात प्रधानन्यायाधिशय् सिफारिस याःगु खः । थ्वहे दथुइ प्रधानन्यायाधीश अनुपराज शर्मां उमेर हदया कारणं बिहीवाः अवकाश प्राप्त यानादीगु दु ।
