शिक्षण अस्पतालया आकस्मिक सेवा सुचारु

स्थानीयवासीतय् तच्वःगु दबाव वयेवं बिहीवाः निसें शिक्षण अस्पतालया आकस्मिक सेवा सुचारु जूगु दु । वंगु झिंनिन्हु निसें आन्दोलन यानाच्वंपिं चिकित्सकतय्सं थःपिनिगु माग पूवंकेमाःगु धासें बहिरंग सेवा बन्द यानाः आन्दोलन यानाच्वंगु खःसा निन्हु न्ह्यः निसें आकस्मिक सेवा नापं बन्द यानाः आन्दोलन याःगु खः ।

तःन्हु निसें शिक्षण अस्पताल बन्द जुइवं साधारण जनता स्वास्थ्य जाँच पाखें प्रभावित जुइवं स्थानीवासीतय्सं बिहीवाः प्रदर्शन याःगु खः । उमिसं शिक्षण अस्पतालया प्रशासनयात दक्वं सेवा सुचारु यायेत अल्टिमेटम नं ब्यूगु दु । उमिसं दक्वं सेवा सुचारु मजुतल्ले प्रदर्शन यानाच्वनीगु खँ धाःगु दु ।