राज्यपाखें पत्रकारतय्त याःगु आक्रमण प्रति प्रचण्डया आपत्ति
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राज्य पाखें हे पत्रकारतय्त जुयाच्वंगु आक्रमण प्रति आपत्ति प्वंकादीगु दु ।
जनकपुरय् प्रहरीया आक्रमणं घाःपाः जूपिं पत्रकारतय्त न्हू बानेश्वरय् च्वंगु कान्तिपुर अस्पतालय् वनाः नापलायेधुंकाः बिहीवा: पत्रकारतनाप खँल्हाबंला यानादिसें वय्कलं थंज्याःगु ज्या निन्दनीय जूगु प्रतिक्रिया बियादिल । वय्कलं पत्रकारतय् राज्य पाखें जुयाच्वंगु आक्रमण राज्य आतंक जूगु नं धयादिल । वय्कलं धयादिल, 'राज्यस्तरं पत्रकारतय्त जूगु आक्रमणयात राज्य आतंक हे धा:सां ज्यू ।'
अथेहे वय्कलं सरकार जनताया सुरक्षा यायेत असफल जूगु धयादिल । पत्रकारतय्त आक्रमण याइपिंत कारवाही यायेमाःगु धयादिसें वय्कलं थुकीया बारे सरकारं प्रतिबद्धता प्वंकेमाःगु धयादिल । नापं वय्कलं न्हिंन्हिं थें पत्रकारतय्त आक्रमण जुयाच्वंसां सरकार मूकदर्शक जुयास्वयाच्वंगु दव्पं बियादिल ।
छुं दिं न्ह्यः जनकपुरय् छम्ह मिसायात बलात्कार याम्ह प्रहरीयात कारवाही यायेमाःगु माग यानाः प्रदर्शन जूगु बारे समाचार संकल्न यायेत वंपिं पत्रकारतय्त प्रहरीं आक्रमण या:गु ख: । उकी लानाः स्वम्ह पत्रकारत घाःपाः जूगु खः ।
