राज्य पुनर्संरचना आयोग अमान्य: संघर्ष समिति

येँ (सन्ध्या टाइम्स)/थ्वहे वइगु वैशाख १४ गते संविधानसभा घेरे यायेगु ज्याझ्वः बारे सहलह यायेत नेवाः स्वायत्त राज्य मंकाः संघर्ष समितिया थीथी समन्वय समितिया प्रतिनिधितय् दथुइ म्हिगः जूगु मुँज्यां राजनीतिक दलया नेतातय्सं राज्य पुनर्संरचना आयोग दयेकाः हाकनं राज्य पुनर्संरचनाया सवालय् मेकथं ज्या याकेगु धकाः हयाच्वंगु खँयात अस्वीकार याःगु दु ।

संविधानसभाया राज्य पुनर्संरचना नापं राज्य शक्तिया बाँडफाँड समितिं नेवाः स्वायत्त प्रदेश नापं झिंप्यंगू स्वायत्त प्रदेशया अवधारणा हःगुयात सैद्धान्तिक रुपं स्वीकार यायेगु तर नेवाः स्वायत्त प्रदेशय् नेवाः बाहुल्यता दुगु लागायात दुथ्याकेमाः धकाः माग याना वनेगु खँ नं क्वःछिउगु दु।
क्वःछिनातःगु इलय् हे संघीय गणतन्त्र नेपाःया न्हूगु संविधान जारी याकेगु निंतिं संविधान जारी याइगु न्हि स्वयां लछि न्ह्यः बैशाख १४ गते नेवाःतय्सं संविधानसभा घेराउ यायेगु निर्णय नं म्हिगःया मुँज्यां याःगु दु ।

उगु घेराउ ज्याझ्वः ताःलाकेगु निंतिं नेवाःत सक्रिय जुयाः न्ह्याः वनेमाःगु नापं थीथी कथंया ज्याझ्वः नं यायेमाःगु खँय् नेवाः न्ह्यलुवाःतय्सं थःपिनि बिचाः प्वंकादीगु खः ।

नेवाः स्वायत्त राज्य मंकाः संघर्ष समितिया नायः सानुराजा शाक्यया सभापतित्वय् जूगु उगु मुँज्याय् दुजः सुजिव बज्राचार्यं आः तक मंकाः संघर्ष समितिं याना वयाच्वंगु ज्याया बारे जानकारी बियादीगु खः। अथे हे अर्जुन महर्जनं झिंप्यंगू प्रदेशया अवधारणायात स्वीकार यायेमाःगु नापं मंकाः संघर्ष समितिया दुजः खलःतपाखें थःपिनि सैद्धान्तिक अवधारणा पित बीमाःगु खँय् बः बियादिल। नेवाः स्वायत्त राज्य मंकाः परिषद किपूया नायः वीरप्रसाद भन्सारीं संघीयता विरोधीतपाखें सतर्क जुया वनेमाः धयादिल।
मुँज्याय् संघर्ष समितिनाप स्वापू दुपिं नापं थीथी ख्यः व लागाया प्रतिनिधित दानबहादुर श्रेष्ठ, विनोद महर्जन, विजयरत्न असंबरे, मनोहर गुरुवाचार्य, गणेशमान, ज्ञानेन्द्र बज्राचार्य, राजेश्वरमान स्थविर, चैत्यशोभा ताम्राकार नापं मेमेपिंसं नं थःथःगु बिचाः प्वंकादीगु खः ।